ނިޝާން ޢިއްޒުއްދީންގެ ޢިއްޒަތުގެ ވެރިޔާ އުމަރު ޒާހިރުގެ ތަޢުޒިޔާގެ ދަފުތަރުގައި ސޮއި ކުރުމުގެ އިންތިޒާމް ފުވައްމުލައް ސިޓީ ކައުންސިލުން ހަމަޖައްސައިފިއެވެ.
އޮނަރަބަލް ޢުމަރު ޒާހިރު ކޮވިޑް-19ގެ އާލާސްކަންފުޅުގައި އަވަހާރަވުމާ ގުޅިގެން، އެމަނިކުފާނު ދިވެހި ގައުމަށް ކޮށްދެއްވި އަގުހުރި ޚިދުމަތްތަކުގެ ޒިކުރާ އެތައް ބަޔަކު ގެންދަނީ އާކުރަމުންނެވެ.
މިގޮތުން ފުވައްމުލައް ސިޓީ ކައުންސިލުން، ފުވައްމުލައް ސިޓީގައި ޢުމަރު ޒާހިރުގެ ތަޢުޒިޔާގެ ދަފުތަރުގައި ސޮއި ކުރުމުގެ އިންތިޒާމްތައް ހަމަޖައްސާފައިވާއިރު އެމަނިކުފާނު ކުރެއްވި އެންމެ ފަހުގެ ގައުމީ ހިދުމަތަކީ ފުވައްމުލައް ސިޓީގައި މިސްކިތެއް ބިނާކުރެއްވުމެވެ. ފުވައްމުލަކު ފުނާޑު އަވަށުގައި ކުރިން ހުރި މަސްޖިދުއް ސިއްދީގު ތަޅާލުމަށް ފަހު އެ ބިމުގައި އަދި ހަމަ އެ ނަމުގައި އުމަރު ޒާހިރު އަޅުއްވައިދެއްވި މިސްކިތް ހުޅުވާފައިވަނީ މި މަހުގެ 03 ވަނަ ދުވަހުއެވެ.
މީގެ ދެ އަހަރު ކުރިން، ފުވައްމުލައް ސިޓީގެ މަސްޖިދުއް ސިއްދީގު ވަރަށް ބޮޑަށް ވީރާނާވެ ހަލާކުވާން ކައިރިވެފައި ހުރި ކަމަށް ބުނެ އެ މައްސަލަ އުމަރު ޒާހިރުގެ ސަމާލުކަމަށް މީހަކު ގެނެސްދިނުމުން، އެ މަނިކުފާނު ވަނީ ފުވައްމުލައް ސިޓީގައި މިސްކިތެއް އަޅުއްވައިދޭން ނިންމަވާފައެވެ.
އުމަރު ޒާހިރުގެ ގައުމީ ޚިދުމަތް ފެއްޓެވީ، 1950ގެ އަހަރުތަކުގައެވެ. އެމަނިކުފާނު އަދާކުރެއްވި މަގާމުތަކުގެ ތެރޭގައި އައްޑޫ ގަމުގައި ހުންނަވާ ދިވެހި ސަރުކާރުގެ ލޭޒަން އޮފިސަރުކަމާއި، ދާޚިލިއްޔާގެ އެކިއެކި ވަޒީފާތަކާއި މަޖީދިއްޔާގެ ހެޑްމާސްޓަރުކަމާއި، ރޭޑިއޯ މޯލްޑިވްސްގެ ވެރިޔާކަމާއި، އެޑިއުކޭޝަން މިނިސްޓްރީގެ ނާއިބު ކަމާއި، ހޯމް މިނިސްޓްރީގެ ނާއިބުކަން ހިމެނެއެވެ.
މީގެ އިތުރުން އުމަރު ޒާހިރުވަނީ މާލޭ މުނިސިޕަލްޓީގެ ރައީސްކަމާއި މިނިސްޓަރ އޮފް ކޮންސްޓްރަކްޝަން އެންޑް ޕަބްލިކް ވަރކްސް ކަމާއި، ރައީސުލްޖުމްހޫރިއްޔާ އޮފީހުގެ ސީނިއަރ މިނިސްޓަރުކަންވެސް ކުރައްވާފައެވެ. ފާއިތުވި 50 އަހަރު ގައުމީ ފެންވަރުގައި ހާސިލްކުރެވުނު ކޮންމެ ކަމެއްގައި އެމަނިކުފާނުގެ ހިއްސާ ބޮޑެވެ.
