ދެކުނު އެފްރިކާއިން ފެނުނު ކޮވިޑް-19 ގެ އެންމެ ނުރައްކާތެރި ވޭރިއަންޓާއި އެކު، ރާއްޖެ ފުރަ ބަންދުކުރުމުގެ ވިސްނުން ވެގެންދަނީ ގެއްލުން ބޮޑު ވިސްނުމަކަށްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކޮވިޑް-19ގެ އާ ވޭރިއަންޓް، “އޮމިކްރޯން” ދުނިޔޭގެ ބައެއް ގައުމުތަކުގައި ފެތުރެން ފަށައިފައިވާއިރު، މި ވޭރިއަންޓާއި ގުޅިގެން ރާއްޖެއިން ވެސް ގިނަ ފިޔަވަޅުތަކެއް އެޅުމަށް އަންނަނީ މަޝްވަރާކުރަމުންނެވެ. ރައީސް ސޯލިހު އެކަމާ ގުޅިގެން މިއަދު ކުރެއްވި ޓްވީޓުގައި ވިދާޅުވީ އާ ވޭރިއަންޓާ ގުޅިގެން އަޅަން ޖެހޭ ފިޔަވަޅުތަކާ ގުޅޭ މަޝްވަރާތައް ކުރުމަށް ޓެކްނިކަލް އެޑްވައިޒަރީ ގުރޫޕް (ޓެގް)ގެ ބައްދަލުވުމެއް މިއަދު ބާއްވާނެ ކަމަށެވެ.
އާ ވޭރިއަންޓާއި ގުޅިގެން އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕަށް ރައީސް ނަޝީދުކުރެއްވި މެސެޖެއްގައި ވަނީ ކޮވިޑާއި އެކު އުޅުން ނޫން ގޮތެއް ނެތްކަމަށް ވިދާޅުވެފައެވެ. ރާއްޖެ އަނެއްކާ ވެސް ބަންދު ކުރުމުގެ ވިސްނުން ވާނީ ގެއްލުން ބޮޑު ވިސްނުމަކަށްކަން ރައީސް ނަޝީދު ވަނީ ފާހަކުރައްވާފައެވެ.
