“މިނިވަން ކަމުގެ ދިފާއުގައި ދިވެހިން”ގެ ނަމުގައި ޕީޕީއެމުން އިފްތިތާހުކުރި ގައުމީ ހަރަކާތުގައި ހުރިހާ ދިވެހިންވެސް ބައިވެރިވުމަށް މާލެ ސިޓީ މޭޔަރު އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ގޮވާލައްވައިފިއެވެ.
ރައީސް އަބްދުﷲ ޔާމީން އަބްދުލްގައްޔޫމްގެ ވިސްނުންފުޅާއި އިރުޝާދާ އެއްގޮތްވާ ގޮތުގެ މަތިން ފެއްޓި މި ކެމްޕެއިން އިފްތިތާހު ކޮށްދެއްވީ އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އެވެ.
ރޭގެ ހަފްލާގައި ވާހަކަދައްކަމުން ޑރ.މުއިއްޒު ވިދާޅުވީ މިއީ ހުރިހާ ރައްޔިތުންވެސް ސިޔާސީ ވިސްނުމާއި ފިކުރު އެއްފަރާތް ކުރުމަށްފަހު ގައުމުގެ ހާލަތާއިމެދު ވިސްނަން ޖެހޭ ވަގުތު ކަމަށެވެ. މުއިއްޒު ވިދާޅުވީ ގައުމުގެ ކަންކަން ނިންމުމުގެ ބާރު ރައްޔިތުންގެ އަތުން ބީވެ ހިނގައްޖެކަމަށާއި ގައުމުގެ ހާލަތާއިމެދު ވިސްނާ ފިކުރު ހިންގާ ކޮންމެ ރައްޔިތަކަށްވެސް އެއީ ތެދެއްކަން އެނގިގެން ދާނެކަމަށެވެ.
