އައްޑޫ ސިޓީގައި، އޭޝިއަން އެކެޑެމީ އޮފް އެރޮނޮޓިކްސް އިން ހިންގަމުންދާ ފްލައިން ސްކޫލްގެ ދަރިވަރުންނަށް ދިމާވެފައިވާ މައްސަލަތަކާއި ގުޅިގެން އެކަމުގައި އިހުމާލުވާ ފަރާތްތައް ޒިންމާދާރުކޮށް އެ މައްސަލަތަކަށް އަވަސް ހައްލެއް ހޯދައިދިނުމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީއެންސީގެ މެމްބަރު އާދަމް ޝަރީފް އުމަރު، މަޖިލީހަށް މައްސަލަ ހުށަހަޅައިފި އެވެ.
މެމްބަރު އާދަމް ޝަރީފް އުމަރު، މަޖިލިހުގެ ރައީސް މުހައްމަދު ނަޝީދަށް ފޮނުއްވި ސިޓީގައި ވަނީ ފްލައިން ސްކޫލްގައި ކިޔަވަމުން އަންނަ ދިވެހި ދަރިވަރުންނަށް ކުރިމަތިވެފައިވާ އުނދަގޫތައް ނަޝީދުގެ ސަމާލުކަމަށް ގެންނަވައިފަ އެވެ. އޭގެ ތެރޭގައި ދެ އަހަރުގެ ތެރޭގައި ނިންމަން ޖެހޭ ކޯސް، ކިޔަވައި ނުދިނުމުގެ ސަބަބުން ދިގުލައިގެން ދިއުމާއި މަގުބޫލު ސަބަބެއް ނެތި ސްކޫލުން ދަރިވަރުން ވަކިކުރަމުން ދާ މައްސަލަ ހިމެނެ އެވެ.
ފްލައިން ސްކޫލްގައި ހިންގާ ކޯސްތަކަކީ ނުހަނު އަގު ބޮޑު ކޯސްތަކަކަށްވާ އިރު ޝެޑިއުލާ އެއްގޮތަށް ކޯހުގައި ކިޔަވައިނުދިނުމުގެ ސަބަބުން ބައެއް ދަރުވަރުން 4 އަހަރު ދުވަސް ހޭދަކުރަން ޖެހި އެތައް ހަރަދުތަކެއް ކުރަން ޖެހިފައިވާ ކަން ފާހަގަކުރައްވަމުން އާދަމް ޝަރީފް ވަނީ މިހެން ދިމާވުމުން، ސްޓޫޑެންޓް ލޯން ނަގައިގެން ކިޔަވާ ދަރިވަރުންނަށް ކުރިމަތިވާ މާލީ ގޮންޖެހުންތައް ވެސް ބޮޑުކަން ފާހަގަކުރައްވާފައެވެ.
މީގެ އިތުރުން ފްލައިން ސްކޫލުގެ ހާލަތު މިހާރު ހުރި ގޮތުން ދަރިވަރުންނަށް އެތަނުގައި ކޯސް ފުރިހަމަކުރެވޭނެ ކަމުގެ އުއްމީދު ވެސް ގެއްލިފައިވާ ކަމަށް އާދަމް ޝަރީފްވަނީ ސިޓީގައި ފާހަގަކޮށްފައެވެ. މި މައްސަލައިގައި މަޖިލީހުން އަވަަސް ހައްލެއް ހޯއްދަވައި ދެއްވުމަށާއި ސްކޫލަށް ދިމާވެފައިވާ މައްސަލަތައް ދެނެގަނެ ދަރިވަރުންގެ ހައްގުތަކާއި އިމްތިޔާޒުތައް ނުގެއްލި ކޯސް ފުރިހަމަކުރެވޭނެ ގޮތަށް ކަންކަން ތަރުތީބުކުރަން އިހުމާލުވާ ފަރާތްތައް ޒިންމާދާރުކުރުވުމަށްޓަކައި ރައްޔިތުންގެ މަޖިލީހުން މަސައްކަތްކޮށްދެއްވުމަށްވެސް މި ސިޓީގައި ވަނީ އެދިވަޑައިގަންނަވާފައެވެ.
