މެލޭޝިއާގައި ހިނގި ނުރައްކާތެރި ކާރު އެކްސިޑެންޓެއްގައި، އެ ގައުމުގައި މަތީ ތައުލީމު ހާސިލުކުރަމުން ދިޔަ ސ. ހިތަދޫއަށް ނިސްބަތްވާ 21 އަހަރުގެ ދިވެހި އަންހެން ދަރިވަރަކު ނިޔާވެއްޖެ އެވެ.
މި ހާދިސާ ހިނގާފައިވަނީ ވިޔަފާރި މޯލަކުން ވިޔަފާރިކޮށް ނިންމާލުމަށް ފަހު، އެނބުރި ގެއަށް ދިޔުމުގެ މަގުމަތީގަ އެވެ. އެކްސިޑެންޓު ހިނގި ވަގުތު އެ އުޅަނދުގައި އިތުރު ދިވެހި ދަރިވަރަކު ވެސް އިނެވެ.
މި ހިތާމަވެރި ހާދިސާގައި 21 އަހަރުގެ ދަރިވަރު ނިޔާވި ނަމަވެސް، ކާރުގައި އިން އަނެއް ދަރިވަރު ވަނީ އެއްވެސް ބޮޑު އަނިޔާއެއް ނުލިބި ސަލާމަތްވެފަ އެވެ. މި ހާދިސާއާ ގުޅިގެން މެލޭޝިއާގައި ދިރިއުޅޭ ދިވެހި ދަރިވަރުންނާއި އާއިލާތަކަށް ވަނީ ބޮޑު ސިހުމަކާއި ހިތާމައެއް ލިބިފަ އެވެ.
މި އެކްސިޑެންޓު ހިނގަން މެދުވެރިވި ސަބަބާއި އިތުރު ތަފުސީލު ހޯދުމުގެ މަސައްކަތް އެ ގައުމުގެ ކަމާބެހޭ އިދާރާތަކުން މިހާރު އަންނަނީ ކުރަމުންނެވެ. އަދި ނިޔާވި ދަރިވަރުގެ އާއިލާއަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ވެސް އަންނަނީ ކުރެވެމުންނެވެ.
