މިދިޔަ ހުކުރު ދުވަހުގެ ރޭ ޤާނޫނުއަސާސީ އިސްލާހުކުރަން ބޭއްވި މަޖިލީހުގެ ޖަލްސާގައި ހެލްތް ޕްރޮޓެކްޝަން (އެޗްޕީއޭ) ގެ އެންގުމާއި ޚިލާފްވި މެމްބަރުންގެ މައްޗަށް ދައުވާ ކުރަން ޖެހޭކަމަށް ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެއެވެ.
ހައިލަމް ކުރެއްވި ޓްވީޓެއްގައި ޕްރޮސެކިއުޓަރ ޖެނެރަލްގެ އޮފީސް ޓެގްކުރައްވާ ވިދާޅުވީ އެޗްޕީއޭގެ އެންގުމާއި ޚިލާފަށް މަގުމަތީގައި އުޅޭ މީހުންނަށް ޕީޖީއިން ދައުވާ ކުރާ އުސޫލުން އެންގުމާއި ހިލާފްވި މެމްބަރުންނަށްވެސް ދައުވާކުރަންޖެހޭ ކަމަށެވެ. ” މެންބަރުންގެ މައްޗަށްވެސް އަޤޫބާތުގެ 533 ވަނަ މާއްދާގެ ދަށުން ޤާނޫނު ހިންގުމަށް ހުރަސްއެޅި ކުށުގެ ދައުވާ ކުރަންޖެހޭ” ހައިލަމްގެ ޓުވިޓްގައި ވިދާޅުވިއެވެ.
އެޗްޕީއޭގެ އެންގުމާ ޚިލާފަށް މަގުމަތީގައި އުޅޭ ފަރާތްތަކުގެ މައްޗަށް ދަޢުވާކުރާ އުޞޫލުން، އެޗްޕީއޭގެ އެންގުމާ ޚިލާފަށް މަޖިލީހުގައި ގައިދުރުކަން ނަގައިލި މެންބަރުންގެ މައްޗަށްވެސް ޢުޤޫބާތުގެ 533 މާއްދާގެ ދަށުން ޤާނޫނު ހިންގުމަށް ހުރަސްއެޅުމުގެ ކުށުގެ ދަޢުވާކުރަންޖެހޭ. @PGO_MV
— Ahmed Hailam (@AhmedHailam) June 4, 2020
ކައުންސިލަރުންނަށް އިންތިހާބެއް ބޭއްވެންދެން އެ މަގާމުގައި ތިބެވޭނެ ގޮތް ހެދުމަށް ގާނޫނު އަސާސީއަށް އިސްލާހު ގެނައުމަށް ބޭއްވި ޖަލްސާއަކީ ގާނޫނާއި ހިލާފަށް ބާއްވާ ޖަލްސާއެއް ކަމަށް ވިދާޅުވެ އިދިކޮޅު މައި ޕާޓީ ޕީޕީއެމްގެ ނައިބު ރައީސް، ނައިފަރު ދާއިރާ މެމްބަރު އަހްމަދު ޝިޔާމް ވާހަކަދައްކަވަން ފެއްޓެވުމުން، ރިޔާސަތުން ނަން އިއްވުމުންވެސް ޝިޔާމް ބޭރަށް ނިކުމެވަޑައިނުގެން، ތަޅުމުގައި މަޑުކުރެއްވުމުން އެމްޑީޕީގެ ގިނަ މެމްބަރުންތަކެއް އޭނާ ނެރުމަށް މަސައްކަތްކޮށްފައިވާއިރު މެމްބަރުންވަނީ އެޗްޕީއޭ އިން އެންގި އެންގުންތަކާއި ހިލާފުވެފައެވެ.
މި ކަމާއި ގުޅިގެން ސޯޝަލް މީޑިއާގައި ވެސް މެމްބަރުންނަށް ގިނަ ފާޑުކިޔުންތަކެއްވަނީ އަމާޒުވެފައެވެ.
