ކޯވިޑް19އިން ރައްކާތެރިވުމަށް އެޅި ވަރުގަދަ ފިޔަވަޅުތަކުގެ ތެރޭގައި ރާއްޖޭގައި ހެދި ކަރަންޓީނު ފެސިލިޓީތަކަކީ މުޅި ދުނިޔޭގެ ލޯ އެތަންތަނަށް ހުއްޓުނު ހިތްގައިމު ކަރަންޓީނު ފެސިލިޓީތަކެވެ.
އެންމެ 10 ދުވަހުގެ ތެރޭގައި މާލެ އަތޮޅު ވިލިވަރުގައި ހެދި ކަރަންޓީނު ފެސިލިޓީއަކީ ދުނިޔޭގައި މިހާތަނަށް ހެދި އެންމެ ހިތްގައިމު ކަރަންޓީން ފެސިލިޓީިކަމުގައި ޗައިނާގެ ޚަބަރު ފަތުރާ މީޑިއާއެއްކަމަށްވާ “ސައުތު ޗައިނާ މޯނިންގ ޕޯސްޓް ނިއުސް” އިންވެސް ބުނެފައިވާއިރު މި ތަނުގެ އިތުރުން ރާއްޖޭގެ ހިތްގައިމު ރިސޯޓްތައްވެސް އަންނަނީ ކަރަންޓީން ފެސްލިޓީގެ ގޮތުގައި ބޭނުންކުރަމުންނެވެ.
ވައިގެ މަގުން ދިވެހިރާއްޖެއަށް އަންނަ މީހުންގެ ތެރެއިން ރިސޯޓުތަކަށް އަންނަ ފަތުރުވެރިން ފިޔަވަައި، އެހެން ހުރިހާ މީހުން ސަރުކާރުން ކަނޑައަޅާ ތަނެއްގައި 14 ދުވަސް ވަންދެން ކަރަންޓީން ކުރަން އެޗްޕީއޭއިން ނިންމުމާއެކު ރާއްޖެއިން ބޭރުން އަންނަ ދިވެހިން ކަރަންޓީންކުރަން ފެށީ މި ހިތްގައިމު ކަރަންޓީން ފެސްލިޓީތަކުގައެވެ. ބައެއް މީހުންނަށް މިކަން ބޮޑު މައްސަލައަކަށްވީ އިރު ގިނަ މީހުން ހިތްހަމަޖައްސާލީ ކަރަންޓީން ރޫމްތަކުގެ ހިތްގައުމުކަމުގެ ސަބަބުންނެވެ.
އެހެންނަމަވެސް މި ކަރަންޓީން ރޫމްތަކުގައި 14 ދުވަސް ހޭދަކޮށްފައިދާ ބައެއް މީހުންގެ އަމަލުތަކުގެ ސަބަބުން އަނެއްކާވެސް މި ވަނީ އިތުރު މައްސަލައެއް ފެންމަތިވެފައެވެ. ޓުވިޓާގައި މިހާރު ދައުރުވަމުންދާ ވީޑިއޯ އިން ފެންނަމުންދަނީ ކަރަންޓީންކޮށްފައިވާ ކޮޓަރި ދޫކޮށް ދިވެއްސަކު ދިޔައިރު އޭނާގެ ކޮޓަރީގެ ހާލަތެވެ. ގިނަ އަދަދެއްގެ ޕްލާސްޓިކް ކޮޓަރިތެރޭގައި ބޭނުންކޮށްފައިވާއިރު މުޅި ކޮޓަރިތެރެއިންވެސް ފެނިގެންދަނީ ‘ސާފުތާހިރުކަމެއް ނެތް ‘މަންޒަރެކެވެ.
How some maldivians are apparantly leaving their quarantine rooms ??.
Some rooms apparantly needed deep cleaning.Oh and on a seperate note, look at the amount of plastic generated by just one room. pic.twitter.com/KYHGNLZg0F
— Alim (@alimadnaan) April 10, 2020
މިފަދަ ބަލިމަޑުކަމެއް ފެތުރެމުންދާ ދުވަސްވަރެއްގައި ސާފުތާހިރުކަމަށް ހާއްސަ އިސްކަމެއް ދިނުމަށް ކަމާއި ބެހޭ ފަރާތްތަކުން ގޮވަމުންދާ އިރު މިކަމުގައި އާންމުންގެ އެހީތެރިކަމާއި އެއްބާރުލުންވެސް ނުހަނު ބޭނުންވާނެކަން ޔަގީނެވެ. ދިވެހިންނަކީ އަބަދުވެސް ސާފުތާހިރުކަމަށް ލޯބިކުރާ ބަޔަކަށްވީ ހިދު ދިވެހިންގެ ތެރެއިން ބައެއް މީހުން ކުރާ މިފަދަ ނޭދެވޭ އަމަލުތަކުގެ ސަބަބުން އެކަމުގެ ގެއްލުން އެހެން މީހުންނަށްވެސް ފޯރުމަކީ އެކަށީގެންވާ ކަމެކެވެ.އެހެންކަމުން އަބަދުވެސް ތިމާގެ ސިއްހަތާއި އަދި އެހެން މީހުންގެ ސިއްހަތާއި މެދު ވިސްނާ ތިމާ އުޅޭ މާހައުލު ސާފުކޮށް ބެލެހެއްޓުމަކީ ތިމާގެ އަމިއްލަ ޒިންމާއެއް ކަމުގައި ދެކުން ވަރަށް މުހިއްމެވެ. އެންމެންގެ ސަލާމަތާއި ރައްކާތެރިކަމަށްޓަކައި ފަރުދީ ޒިންމާ އަދާކުރަމާތޯއެވެ.
