މިހާރު ސަރުކާރުން ދައުލަތުގެ މުއައްސަސާތަކަށް އަތް ނުބާނާ ކަމަށާއި އަދި ރައްޔަތުންގެ މަޖިލީހަކީ މިހާރު ރަބަރު ތަތްގަނޑު ޖަހާ ތަނެއް ނޫން ކަމަށް ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހޫދު ވިދާޅުވީ މިހާރު މަޖިލީހުން ކުރައްވަމުން ގެންދަވާ މަސައްކަތްތަކާއި މެދު ފަހުރުވެރިވާކަމަށެވެ. އަހަރު އެކަނި މަޖިލީހުން 27 ފަހަރަކު މިނިސްޓަރުން މަޖިލީހަށް ހާޒިރުކޮށް ޖަވާބުދާރީ ކުރުވާފައިވާކަން ފާހަގަކުރައްވަމުން ހޫދު ވިދާޅުވީ މި ސަރުކާރާއި ރައީސުލްޖުމްހޫރިއްޔާގެ ފުރިހަމަ އިތުބާރު މި ސަރުކާރުގެ ވަޒީރުންނާއި މެދު އެބައޮތްކަމަށެވެ. ހޫދު މިހެން ވިދާޅުވެފައި މިވަނީ އިސްލާމިކް މިނިސްޓަރު ޑރ. އަޙްމަދު ޒާހިރުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހަޅުއްވާނެ ކަމަށް ސަރުކާރު ހިންގާ މައި ޕާޓީ އެމްޑީޕީއަށް ނިޞްބަތްވާ ބިލަތްދޫ ދާއިރާގެ މެންބަރު އަޙްމަދު ހަލީމް ވިދާޅުވެފައިވާ ދަނޑިވަޅެއްގައެވެ.
މީގެ އިތުރުން މިއަދުގެ ބައްދަލުވުމުގައި ހޫދު ވަނީ މި ސަރުކާރުން ފާއިތުވެދިޔަ އެއް އަހަރު ދުވަގެ ތެރޭގައި ހިންގާފައިވާ މަޝްރޫއުތަކާއި ބެހޭ ގޮތުން މައުލޫމާތު ދެއްވާފައެވެ. މި ގޮތުން ހޫދު ވިދާޅުވީ މި އަހަރަކީ ސަރުކާރުް ރިކޯޑް އަދަދަކަށް މަޝްރޫއުތައް ކުރިއަށް ގެންދިޔަ އަހަރެއް ކަމުގައެވެ
