ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް މަޖިލީހުގެ ވެބްސައިޓުގައި އާންމުކޮށްފިއެވެ.
މަޖިލީހުގެ ގަވާއިދުގައިވާ ގޮތުން މެންބަރުން މާލީ ބަޔާން ހުށަހަޅަންޖެހެނީ އެ މެންބަރަކު ހުވާކުރައްވާ ތާރީހުން ފެށިގެން އަހަރު ދުވަސް ހަމަވުމުންނެވެ. އެގޮތުން 20 ވަނަ މަޖިލީހުގެ މެންބަރުން މާލީ ބަޔާން ހުށަހަޅަންޖެހޭ ފަހު ތާރީހަކީ ކޮންމެ އަހަރެއްގެވެސް އޯގަސްޓް މަހުގެ 31 ވަނަ ދުވަހެވެ. މިއީ 20 ވަނަ މަޖިލީހުގެ މެންބަރުން ހުށަހެޅުއްވި ދެވަނަ މާލީ ބަޔާނެވެ.
މާލީ ބަޔާން ހުށަހަޅަންޖެހޭ މުއްދަތުގެ ތެރޭގައި 93 މެންބަރުންގެ ތެރެއިން 91 މެންބަރުން ވަނީ ބަޔާން ހުށަހަޅުއްވާފައެވެ. މި މުއްދަތުގައި މާލީ ބަޔާން ހުށަނާޅުއްވަނީ މައްޗަންގޮޅި އުތުރު ދާއިރާގެ މެންބަރު އިބްރާހީމް މުހައްމަދު އެކަންޏެވެ.
މީގެ އިތުރުން، ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު ސިނާންގެ މަޤާމު މިއަހަރުގެ އޭޕްރިލް މަހު ގެއްލުނު ނަމަވެސް، އެ މުއްދަތާ ހަމައަށް މެންބަރެއްގެ ގޮތުގައި ހުންނެވުމުން އޭނާވެސް ވަނީ ދެވަނަ މާލީ ބަޔާން ހުށަހަޅުއްވާފައެވެ. އަދި އެ ދާއިރާއަށް އަލަށް އިންތިހާބުވެވަޑައިގެންނެވި މެންބަރު އަބްދުﷲ ސާދިގް މިއަހަރުގެ ޖޫން 15 ގައި ހުވާކުރައްވާފައިވާތީ، މި މުއްދަތުގައި އޭނާ މާލީ ބަޔާން ހުށަހަޅުއްވާކަށް ނުޖެހެއެވެ.
