މި މަހުގެ 15 ވަނަ ދުވަހު އަމީތާބް ބައްޗަން ބޮލީވުޑަށް ތައާރަފްވިތާ ބައިގަރުނު ފުރުން ފާހަގަކޮށްފައިވާއިރު އަމީތާބް އާއި ބެހޭ ގޮތުން އޭނާގެ ސަޕޯޓަރުންނަށް ނޭގޭ ވަރަށް ގިނަ ވާހަކަތައް އަދިވެސް އެބަހުއްޓެވެ. އޭނާގެ ކުޑައިރުގެ ހަޔާތާއި ބެހޭ ގޮތުން ވަރަށް ގިނަ ފަހަރު ވާހަކަދައްކާފައިވީ ނަމަވެސް އަދިވެސް އޭނާގެ ހަޔާތުގައި ރޭކާ އާއި އޭނަގެ ގުޅުމާއި ބެހޭ ބާބަކީ މިހާތަނަށް ހުޅުވާފައިނުވާ ބާބެކެވެ. މީގެ އިތުރުންވެސް އަމީތާބް އާއި ބެހޭ ގޮތުން ގިނަ މީހުންނަށް ނޭގޭ ވަރަށް ގިނަ ކަންތައްތައް އެބަހުއްޓެވެ.
- އަމީތާބްއަށް ލިބިފައިވާ މޮޅު ހުނަރުގެ ތެރެއިން ކަނައަތުން އަދި ވާއަތުން އެއްވަރަކަށް ލިޔުމުގެ ހުނަރަކީވެސް ފާހަގަކޮށްލެވޭ ހުނަރެކެވެ.
- އަމީތާބް ގެ މަޝްހޫރު ފިލްމު ‘ވިޖޭ’ ވިހި ފަހަރަށްވުރެ ގިނައިން އޭނާއަށް ކުޅެންޖެހުނު އިރު ވިޖޭ މި ނަމަކީ ސްކްރީންގައި އޭނާއަށް އެންމެ ކަމުދާ ނަމެވެ.
- ‘ބައްޗަން’ އަކީ މާ ފަހުން އަމީތާބްގެ ބައްޕަ އޭނާގެ ނަމުގެ ފަހަތަށް އިތުރުކޮށްފައިވާނަމެކެވެ. އަމީތާބްގެ ނަމުގެ ފަހަތުގައި ‘އަސްލު’ އޮންނަ ނަމަކީ ‘ޝްރިވާސްތަވާ’އެވެ.
- 1992 ވަނަ އަހަރު އަމީތާބް ކުޅުނު ފިލްމު ‘ހުދާ ގަވާ’އަށް އަފްއާނިސްތާނުގެ ދެބައި ކުޅެ އެއްބައި ސިފައިން އަމީތާބްގެ ސެކިއުރިޓީގެ ގޮތުގައި އެ ގައުމުގެ ރައީސް ވަނީ ފޮނުވާފައެވެ. އަދި މި ފިލްމަކީ އަފްއާނިސްތާނުގައި އެންމެ ގިނައިން ބަލާފައިވާ ހިންދީ ފިލްމެވެ.
- ގަލަމާއި ގަޑި އެއްކުރުމަކީ އަމީތާބްގެ ހޮބީއެވެ. ކޮންމެ އަހަރަކު އަމީތާބްގެ އުފަންދުވަހު ބެލްޓާއި ގަލަމަށް ހާއްސަ ބްރޭންޑެއް ކަމަށްވާ ‘މޮންޓް ބަލަންކާ’އިން އޭނާއަށް ހާއްސަގަލަމެއް ހަދިޔާކުރެއެވެ.
- ކަލްކަތާގައި މަސައްކަތްކުރި ދުވަސްވަރު އަމީތާބް ވަނީ އަށް މީހުންނާއެކު އެއް ނިދާ ކޮޓަރި ހިއްސާކޮށްފައެވެ. އޭރު އޭނާގެ މުސާރައަކީ 500 ރުޕީސްއެވެ. އޭގެ ތެރެއިން 300 ރުޕީސް އޭނާ ހަރަދުކުރަން ޖެހުނީ ނިދާ ކޮޓަރީގެ ކުލި ދެއްކުމަށެވެ
- އަމީތާބްގެ ބަންގްލޯ ‘ ޖަލްސާ’އަކީ ފިލްމު ‘ސައްތަޕޭ ސައްތަ’ ގައި އަމީތާބް ދެއްކި މޮޅު ހުނަރުގެ ސަބަބުން ފިލްމުގެ ޑައިރެކްޓަރު ރަމޭޝް އޭނާއަށް ހަދިޔާކުރި ބަންގްލޯއެކެވެ. ފަހުން ޓެކްސް މައްސަލަ ޖެހުމާއި ގުޅިގެން އެގެ ރަޖިސްޓްރީ ކޮށްފައިވަނީ އަމީތާބްގެ ބޭބެ ރަމޯލާ ބައްޗަންގެ ނަމުގައެވެ.
- އަމީތާބްގެ ދިރިއުޅުމުގެ ކުރީ ކޮޅު ދިމާވި ދަތިތަކާއެކު ދިރިއުޅޭނެ ތަނެއް ނުލިބި، އޭނާވަނީ ރޭލް ސްޓޭޝަން، ބަސް ސްޓޭޝަން އަދި އޭނާގެ އެކުވެރިންގެ ގޭގައިވެސް ނިދާފައެވެ.
- އަމީތާބްގެ ކާމިޔާބު ފިލްމު ‘ޒަންޖީރް’ ކުރިން އޭނާ ކުޅުނު ބާރަ ފިލްމުވެސްވަނީ ފްލޮޕްވެފައެވެ.
- 1973 ވަނަ އަހަރު ޖަޔާ އާއި އަމީތާބް ވަރަށް ކުއްލި ގޮތަކަށް ކައިވެނިކޮށްފައިވާއިރު، އޭރު ދެ ތަރިން އެހާ ކުއްލި ގޮތަކަށް ކައިވެނި ކޮށްފައިވަނީ ފިލްމު ޒަންޖީރްއަށް ލިބުނު ކާމިޔާބީ ފާހަގަކުރުމަށް ދެމީހުން އިންޑީއާއިން ބޭރަށް ދިއުމަށެވެ.
- އަމީތާބްގެ މަޝްހޫރު ‘ބިގްބީ’ އަކީ 1990 ވަނަ އަހަރު ފިލްމީ މަސައްކަތައް އޭނާ އެބުރި އައުމާއެކު ހެދިގެން ދިޔަ ނަމެކެވެ
- ސައި އަދި ކޮފީ ބުއިމަކީ އަމީތާބް އެއްގޮތަކަށްވެސް ކުރާ ކަމެއް ނޫނެވެ. އަދި މިހާރު އޭނާވަނީ ދުންފަތުގެ އިސްތިއުމާލުކުރުމާއި ރާބުއިންވެސް ހުއްޓާލާފައެވެ.
- އަމީތާބްއަކީ މުޅި ބޮލީވުޑްގައިވެސް ހަގީގީ ދިރިއުޅުމުގެ ދަރިފުޅުގެ، ދަރިއެއްގެ ރޯލު ފިލްމެއްގައި ކުޅެފައިވާ ހަމައެކަނި ފަންނާނެއެވެ. އަމީތާބްގެ މަޝްހޫރު ފިލްމު ‘ޕާ’ގައި އޭނާގެ ބައްޕައަކީ އަބީޝެކް ބައްޗަންއެވެ.
- އަމީތާބްއަކީ އިންޑިއާގެ ފިލްމީ ތާރިހުގައިވެސް އެންމެ ގިނަ ޑަބަލް ރޯލުކުޅެފައިވާ ތަރިއެވެ
- 1976 ވަނަ އަހަރު ފިލްމު’ ދޯ އަންޖާނޭ’ އިން ރެކާ އާއި އަމީތާބުގެ ލޯބީގެ ގުޅުން ފެށިއިރު މިއީ މިހާތަނަށްވެސް އެ ގުޅުމެއްގެ ހަގީގަތް އެންމެ ބޮޑަށް ސިއްރުވެފައިވައިވާ ބޮލީވުޑްގެ ގުޅުމެވެ.
- ބޮލީވުޑްގެ ތާރިހުގައިވެސް އެއް މަހެއްގެ ތެރޭގައި ސުޕަހިޓް ހަތަރު ފިލްމު ރިލީޒްކުރެވުނީ ހަމައެކަނި އަމީތާބްގެއެވެ. 1987 ވަނަ އަހަރު އޮކްޓޯބަރު މަހު އަމީތާބް ގެ ‘މުގައްދަރްކާ ސިކަންދަރު’، ކަސަމެވާދޭ’ ތްރިޝުލް އާއި ޑޮންއަކީ އެ ދުވަސްވަރުގެ އެންމެ މަޝްހޫރު ފިލްމުތަކެވެ.
