އިންޑިއާގެ ދެކުނުގެ ސްޓޭޓެއްކަމަށްވާ ކެރެލާއަށް ބޯކޮށް ވާރޭވެހި ބިންގަޑު ކަނޑައިގެންދިއުމުގެ ހާދިސާގައި މަރުވި މީހުންގެ އަދަދު 37 އަކަށް އަރައިފިއެވެ
ބުދަ ދުވަހުން ފެށިގެން ކެރެލާއަށް މޫސުމް ގޯސްވެ ވާރޭވެހެމުންދާއިރު އެ ސްޓޭޓްގެ 1031 ހެކްޓަރުގެ ގޮވާމުގެ ބިންތައް ވަނީ ހަލާކުވެފައެވެ. މި ހާދިސާގައި 31،000 މީހުންގެ ގެދޮރު ގެއްލިފައިވާއިރު މިހާރު އެމީހުން ވަނީ މީހުން ބޭތިއްބުމަށް ސަރުކާރުން ގާއިމްކޮށްފައިވާ ކޭމްޕްތަކަށް ބަދަލުކޮށްފައެވެ
ކެރެލާގެ 14 ޑިސްޓްރިކްޓްގެ ތެރެއިން 8 ޑިސްޓްރިކްޓަށް އެންމެ ނުރައްކާތެރި ހާލާތުގެ އިންޒާރުނެރެފައިވާކަމަށް އެ ސަރަހައްދުގައި ހަރަކާތްތެރިވަމުންދާ އޮފިޝަލަކުވަނީ ބުނެފައެވެ. އިންޑިއާގެ މޫސުމާ ބެހޭ އިދާރާއިން މި މަހުގެ 15 ވަނަ ދުވަހާއި ހަމައަށް ވިއްސާރަކުރާނެކަމަށް ލަފާކޮށްފައިވާއިރު ފެންބޮޑުވެފައިވާ ސަރަހައްދުތަކުން މީހުން ސަލާމަތްކުރުމުގެ މަސައްކަތް އަދިވެސް އަންނަނީ ކުރަމުންނެވެ
