މިއަހަރު ރާއްޖޭގައި ބާއްވާ ރިޔާސީ އިންތިޚާބު އޮބްޒާވު ކުރުމުގެ ދައުވަތު ހަތް ގައުމަކަށް ދީފިއެވެ.
އިލެކްޝަންސް ކޮމިޝަނުން އިއްޔެ ކުރި ޓްވީޓެއްގައި ބުނެފައިވަނީ އިންތިޚާބު އޮބްޒާވު ކުރުމަށް ޔޫރަޕްގެ ދެ ގައުމަކަށާއި ސާކްގެ ދެ ގައުމަކަށް އަދި އޭޝިއާ ޕެސިފިކްގެ ދެ ގައުމަކަށާއި އަރަބި ގައުމަކަށް ދައުވަތު ދީފައިވާ ކަމަށެވެ. މީގެ އިތުރުން އިންތިހާބު އޮބްޒާވު ކުރުމުގެ ދައުވަތު ބައިނަލްއަގުވާމީ ތިން ޖަމްއިއްޔާ އަކަށްވެސް ފޮނުވާފައިވާކަމަށް އީސީ އިން ބުނެއެެވެ
ސެޕްޓެމްބަރު 23 ވަނަ ދުވަހު ބާއްވަން ނިންމާފައިވާ ރިޔާސީ އިންތިހާބު އޮބްޒާވުކުރުމުގެ ދައުވަތު ދިން ގައުމުތައް ކަނޑައެޅީ އިލެކްޝަންސް ކޮމިޝަންތަކާ ބެހޭ ބައިނަލް އަގުވާމީ ޖަމްއިއްޔާ ތަކާ ވާހަކަ ދައްކައި، އެ ޖަމްއިއްޔާ ތަކުގެ މަޝްވަރާ އާ އެކު ކަމަށް އީސީ އިންވަނީ ބުނެފައެވެ.
