ފަނޑިޔާރުންގެ އަޤުލަބިއްޔަތުން ސާފުކޮށް ނިންމަވާފައި އޮތް އަމުރެއް ތަންފީޒު ނުކޮށް ފުލުހުންނާއި ސިފައިން ތިއްބެވީ ކީއްވެތީ ވިދާޅުވެ ކުރީގެ ބަންޑާރަ ނައިބު އަލްއުސްތާޛާ ދިޔާނާ ސަޢީދު ސުވާލުކޮށްފިއެވެ
މިއަދު ދިޔާނާ ކުރެއވި ޓުވިޓެއްގައި ވިދާޅުވީ ސުޕްރީމް ކޯޓުން އަމުރު ނެރުމުގައި 3 ފަނޑިޔާރުންގެ ނުބައި ނިޔަތެއް ނެތްކަމުގައި ދައުލަތުން ސަރީހަ ބަހުން ބުނެ އެއްބަސްވެފައިވާ ކަމަށާއި 1 ފެބްރުއަރީގައި ސުޕްރީމް ކޯޓުން ނެރުނު އަމުރު ތަންފީޒުނުކުރުމަކީ ބޮޑު އަރަތެއް ކަމުގައެވެ
1 ފެބްރުއަރީ ގައި ސުޕްރީމް ކޯޓުން ނެރުނު އަމުރާއި ގުޅިގެން ރާއްޖޭގެ ސިޔާސީ މަސްރަހު ހޫނުވެފައިވާއިރު، ސަރުކާރުންވަނީ ފެބްރުއަރީ މަހުގެ 5 ވަނަ ދުވަހު ކުއްލި ނުރައްކަލުގެ ހާލަތު އިއުލާންކުރެއްވުމަށްފަހު އެ ދުވަހުގެރޭ އުއްތަމަ ފަނޑިޔާރު އަބްދުﷲ ސައީދު އާއި ސުޕްރީމް ކޯޓުގެ ފަނޑިޔާރު އަލީ ހަމީދު ފުލުހުންގެ ބެލުމުގެ ދަށަށް ގެންގޮސްފައެވެ
