ރައްޔިތުންގެ މަޖިލީހުގެ ސެކިއުރިޓީން، ވިލުފުށީ ދާއިރާގެ މެންބަރު ރިޔާޒް ރަޝީދު ޑޮކިއުމަންޓުތައް އަޅަން ބޭނުން ކުރާ ދަބަސް ޗެކު ކުރި ކަމަށް ވިދާޅުވެ ކަންބޮޑުވުން ފާޅުކުރައްވައިފިއެވެ
މަޖިލީހުގެ ތަޅުމުގައި ވާހަކަދައްކަވަމުން ރިޔާޒް ވިދާޅުވީ މިއަދު މަޖިލީހަށް ވަންނަން އައުމުން ސެކިއުރިޓީން އޭނާ ހުއްޓުވުމަށްފަހު ދަބަސް ފާސްކޮށްފައިވާކަމަށާއި މަޖިލީހަށް ވެއްދޭނެ އެއްޗެއްސާއި ނުވެއްދޭނެ އެއްޗެހި މަޖިލީހުގެ ގަވާއިދުގައި ލިޔެފައިވާ ކަމަށެވެ. އަދި މަޖިލީހުގެ ސެކިއުރިޓީން ބޭނުން ގޮތަކަށް އަމަލެއް ނުކުރެވޭނެ ކަމަށް ވިދާޅުވެ ރިޔާޒްވަނީ ވަރަށް ބޮޑަށް ނުރުހުން ފާޅުކޮށްފައެވެ
މީގެ އިތުރުން ރިޔާޒް ވިދާޅުވީ ބަލާ ފާސް ކުރާނަމަ ދުރާލާ އެކަން މެންބަރުންނަށް އަނގާފައި ބޭއްވުމަށް އެދޭ ކަމަށާއި އުސޫލާ ހިލާފަށް އަމަލު ކުރުމުން މެންބަރުންގެ ކަރާމާތައް ހުރަސް އެޅޭ ކަމަށެވެ.އަދި މަޖިލީހުގެ އިމްތިޔާޒުތަކުގެ މާއްދާ ގާނޫނު އަސާސީގައި ލިޔުނީ ހަމަ ލިޔަން ވެގެން ނޫން ކަމަށާއި އެއީ އަމަލު ކުރަން ލިޔުނު އެއްޗިހި ކަމުން މެމްބަރުންގެ ކަރާމާތައް ހުރަސް އެޅޭ ގޮތަށް ކަންކަން ނުކުރެއްވުމަށް އެދޭ ކަމަށެވެ
