ވ. އާރަށް ކުއްޔަށް ދޫކުރި މައްސަލައިގައި ކުރީގެ ރައީސް އަބްދުﷲ ޔާމީން މައްޗަށް ކުރެވޭ ދައުވާގެ ޝަރީއަތުގައި، އެމަނިކުފާނުގެ ދިފާއީ ހެއްކަށް ފުރުސަތު ނުދިނުމަށް ދައުލަތުން ކްރިމިނަލް ކޯޓުގައި އެދިއްޖެއެވެ.

އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑާކުރި ކަމަށް ބުނެ ކުރާ މި ދައުވާގައި، ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށްވެސް ދައުވާ ކުރެއެވެ.

AD

ކްރިމިނަލް ކޯޓުގައި ބޭއްވި އަޑުއެހުމުގައި ދައުލަތުން ޔާމީންގެ ބައެއް ދިފާއީ ހެކިތައް ބަލައިނުގަތުމަށް އެދުނީ، ތަހުގީގު މަރުހަލާގައި އެމަނިކުފާނު ހަނު ހުންނެވުމަށްފަހު، އެ މަރުހަލާގައި ހާމަނުކުރާ ހެކިތަކެއް ޝަރީއަތުގެ މަރުހަލާގައި ހުށަހެޅުމަށް ފުރުސަތު ދީގެން ނުވާނެ ކަމަށް ބުނެއެވެ.ދައުލަތުން ބަލައިނުގަތުމަށް އެދެނު ހެކިންގެ ތެރޭގައި މާލޭގެ ކުރީގެ ޑެޕިއުޓީ މޭޔަރު އަހުމަދު ނަރީޝް، އަބްދުﷲ ރަޝީދު، ވިލިމާލެ ދާއިރާގެ މަޖިލިސް މެންބަރު މުހައްމަދު އިސްމާއީލް އަދި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދު ގެ އިތުރުން ޑޮލަރު މާރުކުރިކަން ބަޔާންކޮށްދޭ ލިޔުން ހިމެނެއެވެ.

ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމަށާއި، އެ ފައިސާއަށްވާ ދިވެހި ފައިސާ ޔޫސުފް ނައީމްއާ ނަގުދު ފައިސާގެ ގޮތުގައި ހަވާލުކުރި ކަމަށް ދިފާއުން ބުނެއެވެ. އަދި އެ ފައިސާ ގުނައިގެން ހަވާލުކުރި ކަމަށް ނަރީޝް ވަނީ މީގެ ކުރިން ހެކިބަސް ދީފައެވެ.

މި މައްސަލައިގައި ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ހައި ކޯޓުން ބާތިލްކޮށް، ކްރިމިނަލް ކޯޓުގައި އަލުން ބަލަން އަމުރުކޮށްފައިވާއިރު، ހައި ކޯޓުގެ ނިންމުމުގައި އާ ހެކިތަކެއް ބަލައިނުގަނެވޭނެ ކަމަށް ކަނޑައެޅި ބައި ދައުލަތުން ސުޕްރީމް ކޯޓުގައި އިސްތިއުނާފް ކުރުމާ ގުޅިގެން ކްރިމިނަލް ކޯޓުގެ ޝަރީއަތް ވަނީ މަޑުޖައްސާލާފައެވެ. ނަމަވެސް، ސުޕްރީމް ކޯޓުން ވަނީ އާ ހެކިތައް ބަލައިނުގަނެވޭނެ ކަމަށް ނިންމައި، ހައި ކޯޓުގެ ނިންމުމަށް ތާއިދުކޮށްފައެވެ.