އައްޑޫ އާއި ފުވައްމުލައް ސިޓީގެ ފެނާއި ނަރުދަމާގެ ހިދުމަތާ އެމްޑަބްލިއުސްސީން ހަވާލުވާން ނިންމައި އެކަމާ ގުޅޭ ފްރޭމްވޯކް އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހަސަންއެވެ. އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީއެވެ.
އެއްބަސްވުމުގައި ސޮއިކުރެއްވުމަށްފަހު ފަހުމީ ވިދާޅުވީ، ކުރިއަށް އޮތް މަހުގެ 13 ވަނަ ދުވަހުގެ ކުރިން މި ހިދުމަތްތައް ބަދަލުކުރުމުގެ މަސައްކަތްތައް ނިންމާނެ ކަމަށެވެ. އަދި އޭގެ ފަހުން ފުވައްމުލަކާއި އައްޑޫގައި ފެނާއި ނަރުދަމާގެ ހިދުމަތް ދިނުން އެމްޑަބްލިއުއެސްސީން އަމަލީ ގޮތުން ފަށާނެ ކަމަށް އޭނާ ފާހަގަކުރެއްވިއެވެ.
މިއީ ފެނަކައިގެ ހިދުމަތް ދޭ ބައެއް ރަށްރަށުގެ ހިދުމަތްތައް އެމްޑަބްލިއުއެސްސީ އާއި ސްޓެލްކޯގެ ދަށަށް ބަދަލުކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ ނިންމެވުމުގެ ދަށުން ކުރެވޭ މަސައްކަތެކެވެ. ފެނަކައިގެ އެމްޑީ އަފީފް ވިދާޅުވީ، ހިދުމަތްތައް އަމާންކަމާއެކު އެމްޑަބްލިއުއެސްސީގެ ދަށަށް ބަދަލުކުރުމަށް ދެ ކުންފުނިން ގުޅިގެން ސައިޓްތަކަށް ޒިޔާރަތްކޮށް ސާވޭތައް ކުރުމުގެ މަސައްކަތް ކުރިއަށްގެންދާނެ ކަމަށެވެ.
