ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ކެރިވަޑައިގަންނަވާނަމަ ކުރިއަށް އޮތް އިންތިހާބުގައި އެމަނިކުފާނާއެކު ވާދަކޮށްލަން ވަޑައިގަންނަންވީ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ޕީއެންއެފްއިން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައީސް މުއިއްޒުގެ ސަރުކާރަށް ތިން އަހަރު ވީއިރު އެދެވޭ ކަމެއް ކުރެވިފައި ނުވާ ކަމަށާއި ރައްޔިތުން ވަނީ އެމަނިކުފާނަށް ރަތް ސިގްނަލް ދީފައި ކަމަށެވެ. އަދި ސަރުކާރަށް ފެހި ސިގްނަލް ލިބިފައިވާ ކަމަށް ބުނި ނަމަވެސް، ރައްޔިތުންގެ ފަރާތުން ރަތާއި އޮރެންޖު ނޫން ސިގްނަލެއް ނުލިބޭ ކަމަށްވެސް އެމަނިކުފާނު ފާހަގަކުރެއްވިއެވެ.
ރައީސް ޔާމީން އިތުރަށް ވިދާޅުވީ ސަރުކާރު އޮތީ “ޓްރެފިކްގައި ޖެހިފައި” ކަމަށާއި، ތަރައްގީގެ މަޝްރޫއުތައް ކުރިއަށް ނުގޮސް މަޑުޖެހިފައިވާ ކަމަށެވެ. މަޖިލީހުގެ ރައީސް އަބްދުއްރަހީމް އަބްދުﷲ އިންސާފުވެރި އިންތިހާބަކަށް ބިރުގަންނަ ކަމަށް ވިދާޅުވެ، ޔާމީން ވަނީ އެމަނިކުފާނުގެ ސިޔާސީ ހާލަތަށް ވަރަށް ބޮޑަށް ފާޑުވިދާޅުވެފައެވެ.
މީގެ އިތުރުން ޔާމީން ވިދާޅުވީ ޖަލަށް ލައިގެން ބިރުދެއްކުމުގެ ހިޔާލު ކުރީގެ ރައީސް ސޯލިހްވެސް ގެންގުޅުއްވި ކަމަށާއި، ނަމަވެސް އެފަދަ ކަންކަމަށް ފަސްޖެހިވަޑައިނުގަންނަވާނެ ކަމަށެވެ. އަދި ކެރިވަޑައިގަންނަވާނަމަ ޖަލަށް ލާން ހިޔާލުނުކުރައްވާ، އިންތިހާބުގައި ސީދާ ވާދަކުރެއްވުމަށް ރައީސް މުއިއްޒަށް ރައީސް ޔާމީން ވަނީ ގޮވާލައްވާފައެވެ.
