ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސުން ހޮވުމަށް ސޯޝަލް ސެންޓަރުގައި ބޭއްވި އިންތިޚާބުގައި، އެންމެ ގިނަ ވޯޓު ހޯއްދަވައިގެން ޔޫތު މިނިސްޓަރު އަބްދުﷲ ރާފިއުގެ އިތުރުން 5 ބޭފުޅަކު ނައިބު ރައީސްކަމަށް އިންތިޚާބުވެވަޑައިގެންފިއެވެ.

ޕާޓީގެ ނައިބު ރައީސްކަމުގެ 6 މަގާމަށް 8 ބޭފުޅަކު ވާދަކުރެއްވި މި އިންތިޚާބުގައި ޖުމްލަ 1,095 މަންދޫބުން ވަނީ ވޯޓުލާފައެވެ.

AD

އިންތިހާބުވި 6 ބޭފުޅުންނާއި ލިބުނު ވޯޓުގެ ނަތީޖާ:

1. ޢަބްދުﷲ ރާފިޢު (ޔޫތު މިނިސްޓަރު): 968 ވޯޓު (%88.4)
2. އަޙުމަދު ޝިޔާމް (ފިޝަރީސް މިނިސްޓަރު): 964 ވޯޓު (%88.04)
3. ފާތިމަތު ސައުދާ (ނިލަންދޫ ދާއިރާގެ މެންބަރު): 923 ވޯޓު (%84.29)
4. އިބްރާހީމް ޝުޖާއު (ބާރަށު ދާއިރާގެ މެންބަރު): 862 ވޯޓު (%78.72)
5. މުޙައްމަދު ސައީދު (އިކޮނޮމިކް މިނިސްޓަރު): 833 ވޯޓު (%76.07)
6. މުޙައްމަދު ޙުސައިން ޝަރީފް – މުންދު (ސަރުކާރުގެ އިސް ތަރުޖަމާނު): 780 ވޯޓު (%71.23)

މި އިންތިޚާބުގައި ވާދަކުރައްވައި ނާކާމިޔާބީއާ ކުރިމަތިލައްވަން ޖެހިވަޑައިގަތީ އެލްޖީއޭގެ ސީއީއޯ މުޙައްމަދު ނިމާލް (301 ވޯޓު) އާއި މާފަންނު މެދު ދާއިރާގެ މެންބަރު އަސްމާ ރަޝީދު (288 ވޯޓު) އެވެ.

ކިއުއާރް ކޯޑު މެދުވެރިކޮށް ކުރިއަށްގެންދިޔަ މި ވޯޓާ ގުޅޭ އެއްވެސް ޝަކުވާއެއް އޮތްނަމަ މިއަދު މެންދުރުފަހު 2:00 ގެ ކުރިން ހުށަހެޅުމުގެ ފުރުސަތު ވަނީ ހުޅުވާލާފައެވެ.

އިންތިޚާބީ ކޮމިޓީން މައުލޫމާތުދޭ ގޮތުގައި، ޝަކުވާތައް ބެލުމަށްފަހު މިއަދު ހަވީރު 6:00 ގެ ކުރިން ދާއިމީ ނަތީޖާ އިއުލާންކުރާނެއެވެ. އަދި އިންތިޚާބުވި ފަރާތްތަކާއެކު ޚާއްސަ ޖަލްސާއެއް މިރޭ ބޭއްވުމަށް ވަނީ ހަމަޖެހިފައެވެ.