ގަންބުރި މުންގި މެމޯރިއަލް ފުޓްސަލް ޗެލެންޖުގައި ރޭ ކުޅެވުނު ސެމީ ފައިނަލްގެ ދެވަނަ މެޗުގައި އެފްސީ ވޯރިއާސް ރޮއްވާލުމަށްފަހު އެފްސީ ކޮއިން އިން ފައިނަލަށް ދަތުރުކޮށްފިއެވެ.
ރޭ މިދޫ ފުޓްސަލް ދަނޑުގައި ކުޅެވުނު މި މެޗު އެފްސީ ކޮއިން އިން އެފްސީ ވޯރިއާސް އަށް ލަނޑުޖަހާނެ ފުރުސަތެއް ނުދީ މި މެޗު ނިންމާލީ 3-0 ގެ ނަތީޖާއަކުންނެވެ. މެޗުގެ ފުރަތަމަ ހާފަގައި ދެ ޓީމުންވެސް ނުރައްކާތެރި ހަމަލާތައް އުފައްދާ މެޗިގެ ލީޑް ނެގުމަށް ގިނަ މަސައްކަތްތަކެއްކޮށްފައިވެއެވެ. އެހެންނަ،މަވެސް މެޗުގެ ފުރަތަމަ ހާފް ނިމިގެން ދިޔައީ ދެ ޓީމަށްވެސް ލަނޑެއް ކާމިޔާބުނުކުރެވިއެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ދިޔަ މި މެޗުގެ ދެވަނަ ހާފްގައި އެފްސީ ކޮއިން އިން ވަނީ މެޗުގެ ކުޅުން އިތުރަށް ވަރުގަދަކޮށްފައެވެ. އެގޮތުން އެ ޓީމްގެ ޒައިންގެ ފަރާތުން އާދެޔާ ހިލާފު މޮޅު ކުޅުމެއް ފެނިގެން ދިޔައިރު ދެވަނަ ހާފްގައި އޭނާވަނީ އެ ޓީމަށް ދެ ލަނޑު ކާމިޔާބުކޮށްދީފައެވެ. މީގެ އިތުރުން އެ ޓިމްގެ އަލީ އާމިރު ވަނީ ލަނޑެއް ކާމިޔާބުކޮށްދީފައެވެ.
މި ފޯރިގަދަ ސެމީ ފައިނަލް މެޗު ނިމިގެން ދިޔައީ އެފްސީ ވޯރިއާސް އަށް ނަތީޖާ ބަދަލުކޮށްލާނެ އެެއްވެސް ފުރުސަތެއް ނުލިބިއެވެ.
