މާލެ ސަރަޙައްދުން ފްލެޓް ދޫކުރުމަށްޓަކައި، އެފޯޑަބަލް ހޯމް އޯނަރޝިޕް ސްކީމަށް ހާއްސަކޮށްގެން ޕަބްލިކް ޕްރައިވެޓް ޕާޓްނަރޝިޕް (ޕީޕީޕީ) މޮޑެލްގެ ދަށުން 1000 ހައުސިންގ ޔުނިޓް ތަރައްގީ ކުރުމުގެ މަޝްރޫއުއެއް ހިންގުމަށްޓަކައި 100 އިންސައްތަ ދިވެހިން ހިއްސާވާ 5 ކުންފުންޏަކާ އެކު އެއްބަސްވުމުގައި ސޮއިކޮށްފިއެވެ.
މިއީ ސަރުކާރުގެ ”ބޯހިޔާވަހިކަން އެންމެންނަށް’ ސިޔާސަތުގެ ދަށުން މިހާރު އިއުލާނުކޮށްފައިވާ ‘އާއިލީ ބޯހިޔާވަހިކަމުގެ’ ޕްރޮގްރާމުގެ ދަށުން ހިންގާ މަޝްރޫއުއެކެވެ. މިނިސްޓްރީގައި ބޭއްވި ރަސްމިއްޔާތެއްގައި މި 5 ކުންފުންޏާއެކު މިނިސްޓްރީގެ ފަރާތުން އެއްބަސްވުންތަކުގައި ސޮއިކުރެއްވީ މިނިސްޓަރ ޑރ. އަބްދުﷲ މުއްތަލިބުއެވެ.
މި މަޝްރޫޢުގެ ދަށުން މަސައްކަތް ހަވާލުކުރެވުނު ފަރާތްތަކަކީ:
މި މަޝްރޫއުގެ ދަށުން ހައުސިންގ ޔުނިޓު ތަރައްޤީކުރުމަށް ހަމަޖެހިފައިވަނީ ހުޅުމާލެ ފޭސް 3 ގައެވެ. މަޝްރޫއުގެ މުއްދަތަކީ 30 މަސްދުވަހެވެ. ކޮންމެ ޑިވެލޮޕަރަކަށްވެސް ހަވާލުކުރެވިފައިވަނީ 1 ޕްލޮޓެވެ. މިއީ ރައީސުލްޖުމްހޫރިއްޔާ ޑރ މުޙައްމަދު މުއިއްޒުގެ “ބޯހިޔާވަހިކަން އެންމެންނަށް” މި ސިޔާސަތުގެ ދަށުން މެދުފަންތީގެ އާމްދަނީ ލިބޭ އާއިލާތަކަށް އަތްފޯރާފަށުގައި ބޭންކު މޯގޭޖް ފައިނޭންސް މެދުވެރިކޮށް ގަނެވޭނެ ފުރުޞަތު ތަނަވަސްކޮށްދިނުމަށް ކުރެވޭ މަސައްކަތުގެ ތެރެއިން ހިންގޭ ފުރަތަމަ މަޝްރޫއެވެ.
މި މަޝްރޫއުން އިމާރާތްކުރެވޭ ހުރިހާ ފްލެޓެއްވެސް ވިއްކަން ޖެހޭނީ ސަރުކާރުން އިއުލާންކޮށް އެޕްލިކޭޝަން ބަލައިގަނެފައިވާ “އާއިލީ ބޯހިޔާވަކަން” މި ޕްރޮގްރާމަށް ފޯމު ހުށަހަޅައި ޝަރުތު ހަމަވާ ފަރާތްތަކަށެވެ. މި މަޝްރޫއުގެ ދަށުން އިމާރާތްކުރެވޭ 2 ކޮޓަރީގެ ފުލެޓު ވިއްކޭނެ އެންމެ މަތީ އަގަކީ 1.8 މިލިއަން ރުފިޔާއެވެ. އަދި 3 ކޮޓަރީގެ ފުލެޓު ވިއްކޭނެ އެންމެ މަތީ އަގަކީ 2.3 މިލިއަން ރުފިޔާއެވެ.
