ނަފްރަތު އުފައްދަވައިގެން ކެމްޕޭން ނުކުރައްވަން ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް، އެމްޑީޕީގެ ޗެއާޕާސަންގެ އިންތިޚާބުގައި ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި)އަށް އިލްތިމާސް ކުރައްވައިފިއެވެ.
ރޮޒައިނާ މިހެން ވިދާޅުވެފައިވަނީ، އެމްޑީޕީން ރައީސް މުހައްމަދު ނަޝީދު ބޭރުކޮށްލަން ބަޔަކު މަސައްކަތް ކުރަމުން ގެންދާ ކަމަށާއި އެ ފުރުސަތު ނުދެވޭނެކަމަށް ވިދާޅުވެ އިންތި ދެއްކި ވާހަކަތަކަށް ރައްދު ދެއްވަމުންނެވެ.
އިންތި ދެއްކި ވާހަކަތަކުގެ ވީޑިއޯ އެއް ޓުވިޓްކުރައްވަމުން ރޮޒައިނާ ވަނީ އިންތިގެ ކެމްޕޭނަކީ އިދިކޮޅު ޕާޓީގެ ބަޔަކާއި ދެކޮޅަށް ކުރާ މުޒާހަރާއެއްތޯ ސުވާލުކުރައްވާފައެވެ. އަދި ނަފްރަތު އުފައްދައިގެން އެމްޑީޕީއަށް ލިބެން އޮތް ފައިދާއަކީ ކޮބައިތޯ ރޮޒައިނާ ވަނީ ސުވާލުކުރައްވާފައެވެ.
Idhikolhu partyge bayakaa dhekolhahkuraa muzaahara ehthomee?
Mee ethereyge inthihaabeh. Dhogu hadhaa fithuna ufahdhan masakkai kurumaky party ah hama enme faidhaa hurigoiba? Thigothah party therey nafrathu ufahdhavan noolhuvva reethikoh campaign kuravvan Inthi ah ilthimaaz kuran. https://t.co/TcmdfIdcgk— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 🎈 (@Roxeyna) March 18, 2022
“މިއީ އެތެރޭގެ އިންތިހާބެއް. ދޮގު ހަދާ ފިތުނަ އުފައްދަން މަސައްކަތްކުރުމަކީ ޕާޓީއަށް އެންމެ ފައިދާހުރި ގޮތްބާ؟ތި ގޮތަށް ޕާޓީތެރޭ ނަފްރަތު އުފައްދަން ނޫޅުއްވާ ރީތި ކެމްޕެއިނެއް ކުރަން އިންތިއަށް އިލތިމާސްކުރަން” ރޮޒައިނާ ވިދާޅުވިއެވެ.
އެމްޑީޕީގެ އެތެރޭގެ އިންތިހާބު ފޯރިގަދަވެ ރައީސް ނަޝީދު އާއި ރައީސް އިބްރާހީމް މުހައްމަދު ސޯލިހްގެ ފެކްޝަންގެ މެމްބަރުންގެ މެދުގައި ބަހުގެ ހޫނު ހަމަލާތައް އަންނަނީ ބަދަލުކުރަމުންނެވެ.
