މަޝްރޫއުތައް ކުރިއަށް ގެންދިއުމުގައި މި ސަރުކާރަށްވުރެ، ކުރީ ސަރުކާރުގެ ސްޕީޑް މާ ސްލޯކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ޕީއެސްއެމްގެ “ރާއްޖެ މިއަދު” ޕްރޮގްރާމުގައި، އިދިކޮޅު ފަރާތްތަކުން މި ސަރުކާރުގެ ޕްރޮޖެކްޓްތައް ސްލޯ ކަމަށްބުނެ ދައްކަމުންދާ ވާހަކަތަކަށް ރައްދުދެއްވަމުން މަބްރޫކް ވިދާޅުވީ ކުރީ ސަރުކާރުން، ހިޔާ މަޝްރޫޢުވެސް ފައްޓަވާފައިވަނީ ހަތަރުވަނަ އަހަރުގެ ތެރޭގައިކަމަށެވެ.
މި ސަރުކާރުން މިހާތަނަށް ގެދޮރުވެރިޔާ ލޯނު ޕްރޮގްރާމެއް ފައްޓަވާފައިވާކަން ފާހަގަކުރައްވަމުން މަބްރޫކް ވިދާޅުވީ މިއަހަރު 1.5 ބިލިއަންގެ ހައުސިން ޕްރޮޖެކްޓުގެ ބަޖެޓް ރަށްރަށަށް ފާސްކޮށްފައިވާކަމަށެވެ. އަދި ނައިފަރުގެ 100 ޔުނިޓުގެ ޕްރޮޖެކްޓް ނިމިއްޖެކަމަށާއި އިތުރު 3 ރަށެއްގެ 100 ހައުސިން ޔުނިޓުގެ މަސައްކަތް ކުރިއަށްދާކަމަށް މަބްރޫކް ވަނީ ވިދާޅުވެފައެވެ،
ހިޔާ ފްލެޓާއި ގުޅުވައިގެން ވާހަކަދައްކަވަމުން މަބްރޫކް ވިދާޅުވީ ކުރީ ސަރުކާރުގެ އެންމެ ފަހު އަހަރު ކެމްޕޭން ޖަލްސާ ހިޔާ ފްލެޓްތައް ކައިރީ ބޭއްވި އިރުވެސް އެތަން ރަނގަޅަށް ރާނާ ވެސް ނުނިމޭ ކަމަށެވެ.އަދި އޭރު އެއީ ކޮންސްޓްރަކްޝަން ސައިޓެއް ކަމަށް ވެސް މަބްރޫކް ވިދާޅުވިއެވެ.
