އައްޑޫ ސިޓީ މީދޫ އަކީ ޒަމާނުއްސުރެ ރަށުގެ ކުރިއެރުމާއި، ތަރައްޤީ އަށް ވަކާލާތުކުރަމުން އަންނަ ރައްޔިތުންތަކެއް ދިރިއުޅެމުން އަންނަ ރަށެކެވެ. ސަރުކާރުން ރަށަށް ކޮށްދޭ ކަންތައްތައް ބަލައިގަންނަ ރައްޔިތުންތަކެއް ދިރިއުޅެމުން އަންނަ މިރަށަކީ ޖަމްމިއްޔާ ޖަމާއަތްތަކާއި، ވަކިވަކި ފަރުދުންވެސް އެ ރަށަކަށް ގިނަ ކަންތައްތަކެއް ކޮށްދެމުން އަންނަ ރަށެކެވެ. ރަށު ފެންވަރުގައި އެކި އެކި ދުވަސްތައް ފާހަގަކުރުމާއި، ރަށް ސާފުކުރުމާއި، ރަށަށް ޒިޔާރަތްކުރާ މެހެމާނުންނަށް މަރުހަބާދެންނެވުމަކީ މި ރަށުގެ ޖަމިއްޔާ ޖަމާއަތްތަކުންނާއި ވަކިވަކި ފަރުދުން އިސްނަގައިގެން ކުރަމުން ދިޔަ މަސައްކަތްތަކެވެ. އެހެންނަމަވެސް އޭރު ކުރަމުން ދިޔަ މި މަސައްކަތްތަކަށް މީދޫ އަވަށު އޮފީހުން އެންމެ އެކަށީގެންވާ ފަދަ އެހީތެރިކަމާއި އެއްބާރުލުމެއް ނުލިބެއޭ ބުނުމަކީ އެއްވެސް މީހަކަށް ބުނެވޭ ބަދު ބަހެއްކަމުގައި ނުވާނެކަން ޔަގީނެއެވެ.
މީގެ ކުރިން މީދޫ އޮފީހުގެ މުވައްޒަފުންނަކީ ހަމައެކަނި އެމީހުންގެ ވަޒީފާގެ މަސްއޫލިއްޔާތު އަދާކުރުމަށްފަހު ނިންމާލާ ބައެކޭ ބުނުމަކީ ކުށް ބަހަކަށް ނުވާނެއެވެ. ރަށުގައި ހިންގާ އިޖްތިމާއީ ކަންކަމުގައި އެ މުވައްސަސާގެ މާ ބޮޑު އެއްބާރުލުމެއް ލިބިފައިނުވުމުން، އަވަށު އޮފީހަކީ އޭރު މާ މުހިއްމު ތަނެއްގެ ގޮތުގައި ރަށުގެ ރައްޔިތުންވެސް ނުދެކެއެވެ. “ކުރިން އަވަށު އޮފީހަކީ ހަމައެކަނި ނަމެއްގައި އޮންނަތަނެއް. އެއްވެސް ކަމެއްގައި އެތަނުން ބައިވެރިއެއް ނުވޭ، އަދި ސިޓީ ކައުންސިލްތަކުންނާއި އެހެން މުވައްސަސާތަކުން ޖަމްމިއްޔާތަކަށް އެންގުމަށް ފޮނުވާ މެސެޖްތައްވެސް ބައެއް ފަހަރު ނުލިބޭ. އެއްވެސް ކަމެއްގައި ބައިވެރިނުވާތީ އެ މުވައްސަސާ އާއި އެހެން މުވައްސަސާތަކާއި އޮންނަ ގުޅުންވެސް ވަރަށް ކުޑަ. އިޖްތިމާއީ ކަންކަމުގައި އެ ތަނުގެ ދެތިން މުވައްޒަފުން ފެނުނަސް ފާއިތުވި އަހަރުތަކުގައި އެ މުވައްސަސާ އިން އިސްނަގައިގެން އެއްވެސް ކަމެއް ކޮށްފައެއް ނެތް. މިކަން ބަދަލުކުރުމުގެ މަސައްކަތް ފެށިގެން ދިޔައީ އާ ޑިރެކްޓަރު މާނާ މުންތާޒު އޮފީހާއި ގުޅުނު ހިސާބުން. އެކަމަކު މާނާ އަށްވެސް އެކަނި މިކަން ކުރިއަށް ގެންދެވޭ ގޮތް ނުވެފަ ހުއްޓާ ކައުންސިލަރ އާމިނަތު ސޯލިހާ އިންތިހާބު ވި ހިސާބުން އޮފީހުގެ ތަސްވީރު މުޅިން ބަދަލުވީ” މީދޫ ޖަމްމިއްޔާއެއްގެ އިސް ފަރާތަކުން ބުންޏެވެ.
ރައްޔިތުންނަށް ރަގަޅު ފުރިހަމަ ހިދުމަތެއް ދެވޭނީ ރައްޔިތުންނާއި ގުޅިގެންކަން ޔަގީނެވެ. އަދި މިފަދަ ހިދުމަތެއް ރައްޔިތުންނަށް ދެވޭނީ މަސައްކަތްކުރާ މާހައުލަކީ އުފާވެރި އެއްބައިވަންތަ އެކުވެރި މާހައުލަކަށް ވެގެން ކަން ޔަގީނެވެ. އަވަށު އޮފީހުގެ ‘ލޮނުމަޑު’ ކަމުގެ ސަބަބުން އޭރު ގިނަ ބައެއްގެ ފާޑުކިޔުންތައް އަމާޒުވި މުވައްސަސާ މިވަނީ މަދު ދުވަސްކޮޅެއްގެ ތެރޭގައި މީދޫގެ ރައްޔިތުންގެ ލޯތްބާއި އިހްތިރާމް ހޯދާފައެވެ. މިހާރު އެ މުވައްސަސާއަކީ ރަށުގެ އެންމެންނަށް ނަމޫނާ މުވައްސަސާއެކެވެ. ރަށުގައި ފާހަގަކުރާ ކޮންމެ ހަރާކާތެއްގެ އެންމެ ކުރީ ސަފުން ފެންނަނީ އެ މުވައްސަސާގެ މޫނު ތަކެވެ. އުފާވެރިކަމާއެކު ރަށުގެ އިޖްތިމާއީ މަސައްކަތްތަކަށް އެ މުވައްސަސާ ނުކުތުން ވެގެން ދިޔައީ ގިނަ ބަޔަކަށް ލިބުނު ބޮޑު އުފަލަކަށެވެ.
މީދޫ ކައުންސިލަރ ސޯލިހާއަކީ އަބަދުވެސް އިޖްތިމާއީ ދާއިރާގައި މަސައްކަތް ކުރަމުން އަންނަ ފަރާތެއްކަމުން، އެއީ އަބަދުވެސް މުޖްތަމައުގެ އެކިއެކި ފަރުދުންނާއި ވަރަށް ގާތްގުޅުމެއް އުފެދިފައިވާ ފަރާތެކެވެ. އެހެންކަމުން މީދޫ އަވަށު އޮފީހުގެ މުވައްޒަފުންނަކީ ރައްޔިތުންގެ ކަންތައްތަކުގައި ބައިވެރިވާ އެކުވެރި މުވައްޒަފުންނަށް ހެދުމުގެ މަސައްކަތް ފެށިގެން ދިޔައީ އަވަށު އޮފީހުގެ އެތެރެއިންނެވެ، ކައުންސިލަރު ސޯލިހާ ގެ އިރުޝާދާއެކު ޑިރެކްޓަރު މާނާ އާއި އެހެން މުވައްޒަފުންގެ އެހީތެރިކަމާއެކު އަވަށު އޮފީހާއި މުނިސިޕަލް ސާވިސްގެ މުވައްޒަފުންނަށްވެސް އޮފީހުގެ އެތެރެއަކީ އެކުވެރި އުފާވެރި މާހައުލަކަށް ހެދުމަށްޓަކައި މުވައްޒަފުންގެ ގުޅުން ބަދެހިކުރުމަށް ކުޑަކުޑަ ހަފްލާތައް ބޭއްވިގެން ދިޔައެވެ،
މި ކަމުގެ ނަތީޖާވެސް ވަރަށް ފޮންޏެވެ. މަދު ދުވަސްކޮޅެއްގެ ތެރޭގައި އެ ތަނުގެ މުވައްޒަފުންނަށްވެސް އާ ހިތްވަރެއް ލިބި ކަންކަމުގައި ބައިވެރިވުމުގެ ޖޯޝާ ފޯރި އިތުރުވެގެން ދިޔައެވެ. ” ކޮންމެ ތަނެއްގައިވެސް ލީޑް ނަގައިގެން އެކަން ކުރުވާނެ ރަގަޅު ލީޑަރުން ބޭނުންވޭ. އެކަމަކު މީގެ ކުރިން އެފަދަ ފުރުސަތެއް އަޅުގަނޑުމެންނަށް ލިބިފައެއް ނެތް. ކަމެއްކުރަން ބޭނުންވިޔަސް އެކަމަށް ހިތްވަރުދީ ސަޕޯޓް ދޭނެ އިސްވެރިން ތިބޭ ނަމަ ކޮންމެ ކަމެއްވެސް ކުރުމަށް ޖޯޝާ ފޯރި އުފެދިގެންދާނެ،. އާ ކައުންސިލަރާއެކު އަޅުގަނޑުމެންނަށް ވަރަށް ގިނަ ކަންތައްތަކެއް ދަސްވެއްޖެ. ކަންކަން ކުރުމަށް ހިތްވަރާއި އެހީތެރިކަން ލިބިއްޖެ.މިއީ ކައުންސިލަރާއި ޑިރެކްޓަރުގެ ބުރަ މަސައްކަތް. ދެން މި މުވައްސަސާއިން ރަށުގެ ކޮންމެ ކަމެއްގައިވެސް ބައިވެރިވާނެ” އަވަށު އޮފީހުގައި މަސައްކަތްކުރާތާ ވަރަށް ގިނަ ދުވަސްވެފައިވާ މުވައްޒަފަކު ބުންޏެވެ.
ހަގީގަތުގައިވެސް އާ ކައުންސިލާއެކު އަވަށު އޮފީހުގެ ޓީމުން ތަފާތު ދައްކައިފިއެވެ. އަވަށު އޮފީހުގައި މަސައްކަތްކުރާ ފިސާރި ކަނބަލުންނާއެކު، އެ މުވައްސަސާގެ ކަލުންވެސް މިހާރު ތިބީ އާ ޖޯޝެއްގައެވެ. ފާއިތުވި މަދު ދުވަސްކޮޅުގެ ތެރޭގައި އެ މުވައްސަސާއިން ފާހަގަނުކުރާ ދުވަހެއް ނެތެވެ. އަމިއްލައަށް އިސްނަގައިގެން ކަންތައްތައް އިންތިޒާމުކޮށް ކުރިއަށް ގެންދިއުމުގެ އިތުރުން ރަށުގައި ހިންގާ ކޮންމެ ކަމެއްގައިވެސް އެ މުވައްސަސާއިން ބައިވެރިވަމުން އަންނަނީ ޖޯޝާ ފޯރިއާއެކުގައެވެ. ޖަމްމިއްޔާ ޖަމާއަތްތަކާއި ގުޅިގެން މަސައްކަތްކުރުމަށް އެ މުވައްސަސާ އޮތީ ފުރިހަމައަށް ތައްޔާރުވެފައެވެ. މިހާރު އެއީ އެންމެންގެ ލޯތްބާއި އިހްތިރާމް ލިބިފައިވާ މުވައްސަސާއެކެވެ. ނަމޫނާ މުވައްސަސާއެކެވެ. ރަށުގެ ރައްޔިތުންގެ ލޯބި އެ މުވައްސަސާގެ މުވައްޒަފުން ވަނީ ހޯދާފައެވެ.
