މަޝްވަރާގެ މޭޒަރަށް އުތުރުކޮރެއާ ގެނައުމަށް މަސައްކަތް ކުރަމުން ގެންދާ ކަމަށް އެމެރިކާއިން ބުނެފިއެވެ.
އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަސަން ޗައިނާއަށް މިހާރު ކުރައްވާ ޒިޔާރަތުގައި ނޫސްވެރިންނަށް މައުލޫމާތު ދެއްވަމުން ވިދާޅުވެފައި ވަނީ އެގައުމުން، އުތުރު ކޮރެއާއާ މަޝްވަރާ ކުރުމަށް ބޭނުންތޯ ބައްލަވަމުންދަވާ ކަމަށެވެ.
ޓިލާސަން ވިދާޅުވި ގޮތުގައި އުތުރުކޮރެއާއާ ސީދާ ވާހަކަ ދެއްކުމުގެ ދެތިން ގޮތެއް އެމެރިކާއަށް އޮންނަ ކަމަށެވެ. އަދި މީގެ ކުރީންވެސް އުތުރުކޮރެއާގެ ޕްޔޮންގްޔޭންގްއާ ވާހަކަ ދައްކަވާފައި ވާކަމަށްވެސް ވިދާޅުވިއެވެ. އެ ވިދާޅުވީ ގޮތްތަކާބެހޭ ގޮތުން އޭނާ މާގިނަ ވާހަކައެއް ނުދައްކަވައެވެ.
ޓިލާސަން މިފަދަ ގޮތަކަށް ވާހަކަ ދައްކަވާފައި މިވަނީ އުތުރު ކޮރެއާގެ ލީޑަރު ކިމް ޖޮންގް އުން އާއި އެމެރިކާގެ ރާއިސް ޑޯނަލްޑް ޓްރަމްޕާ ދެމެދު ބަހުގެ ހޫނު ހަމަލާތަކެއް ބަދަލު ކުރެވިފައިވާ ދަނޑިވަޅެއްގައެވެ.
ޓިލާސަން ފާހަގަ ކުރެއްވި ގޮތުގައި މިވަގުތު މަސްރަހުއޮތީ ވަރަށް ހޫނުކޮށެވެ. ހުރިހާ އެންމެން ވެސް މިވަގުތު ހަމަޖެހުން މުހިންމު ކަމަށްވެސް ވިދާޅުވިއެވެ. އެގޮތުން އުތުރު ކޮރެއާއިން މިސައިލްތައް ފޮނުވުން ހުއްޓުމުން ވަރަށްގިނަ ކަންކަން ހައްލުވެގެން ދާނެ ކަމަށް އެނާ ވިދާޅުވިއެވެ.
ޓިލާސަން ޗައިނާ އަށް މިވަގުތު ކުރައްވަމުން ގެންދަވާ ދަތުރުފުޅަކީ ދެ ގައުމުގެ ގުޅުން ރަނގަޅުކޮށް އަދި ޗައިނާއާއި އުތުރު ކޮރެއާއާ އޮންނަ ގުޅުމަށް އަލި އަޅުވާލެވޭނެ ދަތުރަކަށް ވެގެންދާނެ ކަމަށް ދިރާސާ ކުރާ ފަރާތްތަކުން ދެކެއެވެ.
އެމެރިކާގެ އޮފިޝަލުން ބުނާ ގޮތުގައި ޗައިނާއިން މިހާރު އުތުރު ކޮރެއާއި މެދު ފިޔަވަޅު ތަކެއް އަޅަން ދެކޮޅު ހަދަމުން ނުދާ ކަމުގައެވެ. އެ ފަރާތްތަކުން ވިދާޅުވާ ގޮތުގައި އުތުރު ކޮރެއާގެ %90 ވިޔަފާރި ހިއްސާ ކުރާނީ ޗައިނާ އިންނެވެ. އެހެން ކަމުން އދ. އިން އުތުރު ކޮރެއާ ދެކޮޅަށް އަޅަން ނިންމާފައިވާ ފިޔަވަޅުތައް ޗައިނާއިން ތަންފީޒު ކުރުން ވަނީ މުހިންމު ވެފައެވެ.
