ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު, ކުރީގެ ރައީސް މައުމޫން އަބްދުލް ގައްޔޫމްގެ ގެކޮޅަށް ގެއްލުން ދިން މައްސަލަ ފުލުހުން ބަލަން ފަށައިފިއެވެ،
މި މައްސަލައާއި ގުޅިގެން ފުލުހުން ވިދާޅުވީ މއ. ކިނބިގަސްދޮށުގެ ގޭގައި ހުރި ބައެއް ތަކެއްޗަށް ގެއްލުން ދިން މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި މި މައްސަލައާއި ގުޅިގެން ބަލަން ޖެހޭ ކަންކަން ފުލުހުން ބަލަމުންދާ ކަމަށްވެސް ފުލުހުން ވިދާޅުވިއެވެ.
ރިޔާސީ އިންތިހާބުގެ ކެމްޕެއިނަށް ކުރީގެ ރައީސް މައުމޫނަށް ދެއްވި ދަރަނި އަދާކޮށްފައި ނުވާތީ ކަމަށް ވިދާޅުވެ، ޖާބިރު ވަނީ އިއްޔެ މއ. ކިނބިގަސްދޮށުގެ ކައިރިއަށް ވަޑައިގެން އެގޭގައި ހުރި ވެޔޮގަނޑަކަށް ވެސް ގެއްލުން ދެއްވާފައެވެ.
ކިނބިގަސްދޮށުގެ ކައިރި އަށް ވަޑައިގެން، އެތަނުގައި އިރުކޮޅަކު މަޑު ކުރައްވާ ޖާބިރު ވަނީ ބަޔާނެއްވެސް ދެއްވާފައެވެ، މި ގޮތުން ޖާބިރު ވިދާޅުވީ ޝަރުއީ މަރުހަލާގެ ތެރެއިންވެސް އޭނާ އަށް އިންސާފު ލިބިވަޑައިނުގެންނެވި ކަމަށާއި އަދުލު އިންސާފު ނެތުމުން އަމިއްލައަށް އަދުލު އިންސާފު ގާއިމް ކުރަމުންދާ ކަމަށެވެ. އެހެންކަމުން އޭނާ އެތަނުގައި ހުންނެވީ ކިނބިގަސްދޮށުގެ އާއި ހަވާލުވުމަށް ކަމަށް ޖާބިރު ވިދާޅުވިއެވެ،
