ދުވަސްގަނޑަކަށްފަހު މަދިޔަމަކޮޔާ ދިމާވިއިރު މޫނުމަތީގައިވާ އުފާވެރިކަމެއް ނެތެވެ. މީހާ ވަނީ މިލާ މޯޅިވެފައެވެ. ވީދެރައިން އަހަރެން އަހާލީމެވެ. ކޮޔާއެވެ. މޮޅިން މޮޅިސާލު ލައިގެން ތިޔަ ހުރީ އަނެއްކާ ކޮންކަމެއް ލައިގަތީ ހެއްޔެވެ؟ ކޮއި ބަޑިފަޅައިގެން ގޮސްފައި ބުންޏެވެ. ދަރިޔާއެވެ. މޮޅި ނުވާންވީ ކީއްވެ ހެއްޔެވެ؟ މިއުޅެނީ ހަތަރު އުދަރެސް ފެނު ޖެހިގެންނެވެ. އަހަރެން ބުނީމެވެ. ނިކަން ސާފުކޮށް ކިޔައިދީބަލާށެވެ. ކިހިނެއްވީ ހެއްޔެވެ؟
ކޮއި ބުންޏެވެ. ދަރިޔާއެވެ. ބޮޑު ޗުއްޓީގައި ބޭރު ޤައުމަކަށް ގޮސްލާނަމޭ ހިތާ ފައިސާކޮޅެއް އެއްކޮށްފައި އެބަހުއްޓެވެ. މިއަދު އެހެރަ އޮފީހަކަށް އައިޑީ ކާޑާއި ޕާސްޕޯޓު ހައްދަން ދިޔުމުން އެމީހުން ބުނީ އަހަރެންގެ ނަން ބަދަލު ނުކުރަނީސް އައިޑީ ކާޑު ނެހެދޭނެ ކަމުގައެވެ. މިއީ މަގޭ މައިންބަފައިން ހަތް ދުވަހުން މަށަށް ދިން ނަމޭ ބުނުމުންވެސް އެމީހުން އެވާހަކަ ޤަބޫލެއް ނުކުރިއެވެ. އެހެންމީހުންގެ ނަމުގެ ފަހަތުގައި އޮންނަނީ ބައްޕަގެ ނަމޭ އެކަމަކު މަގޭ ނަމުގެ ކުރީގައި މިއޮތީ އަމާގެ ނަމޭ ކިޔައިގެން ވަރަށް މައްސަލަ ޖައްސައިފިއެވެ.
އަހަރެން ހީނލާފައި ބުނީމެވެ. ކޮޔާއެވެ. ދެން ނަން ބަދަލު ކުރަންވީ ނޫން ހެއްޔެވެ؟ އެއީ މާ ބޮޑުކަމެއްވެސް ނޫންތާއެވެ. ރަނގަޅު ބޮނޑިބަތް ގަނޑެއް ކައްކާފައި ރަށަށް ބަހާލާފައި ހެޔޮ ސާޢަތެއްގައި ރީތި ނަމެއް ކިޔާނީއެވެ. ކޮއި ރުޅިއައިސްފައި ބުންޏެވެ. ދަރިޔާއެވެ. ކަލެއަށް އެނގެނީ ކޮންކަމެއް ހެއްޔެވެ؟ މިހާރު ތިހާ ފަސޭހައިން ތިކަމެއް ނުވެއެވެ. ސަރުކާރުގެ އެތައް އޮފީހަކުން ސޮއި ހޯދަން ޖެހެއެވެ. އެއަށްފަހު ރޭޑިއޯއިންނާއި ޓީވީން އެވާހަކަ ކިޔާނެއެވެ. ދަރިޔާއެވެ. ސަރުކާރުގެ އޮފީސް އޮފީހުން އަހަރެން ސޮއި ހޯދާނީ ކިހިނެއް ހެއްޔެވެ؟ އަހަރެންގެ ދަރިއެއް، ގާތް ތިމާގެ މީހެއް އަދި ރައްޓެއްސެއްވެސް އެއިން އޮފީހެއްގައި ނުހުންނާނެއެވެ.
އަހަރެން ނުހޭން ވެގެން ހުއްޓާ ހިނިގަނޑު ފަޅައިގެން ދިޔުމުން ކޮއި ހިތްހަމަ ނުޖެހިފައި ހުރި ފާޑަކަށް ބުންޏެވެ. ދަރިޔާއެވެ. ކަލޭ ހެނީ ކީއްވެހެއްޔެވެ؟ މިޒަމާނުގައި އޮފީސް އޮފީހުން ކަންތައް ކުރެވޭނީ އެތަންތާނގައި ތިބޭ މީހުންގެ ގާތް މީހުންނަށެވެ. އިހަށް ދުވަހުވެސް އަބޫ ކުރަތު އަވަށްޓެރި ތަކުރާ ދިމާއަށް އެއްޗެހި ގޮވަމުން ބުނީ މި ރާއްޖޭގެ ހުރިހާ މުއައްސަސާއެއްގައިވެސް ތިބީ އޭނާގެ ދަރިންކަމުގައެވެ. ކޯޓަކަށް ވިޔަސް ހޮސްޕިޓަލަކަށް ވިޔަސް އެއާޕޯޓަކަށްވިޔަސް ޕޮލިހަކަށް ވިޔަސް ސިފައިންގެއަކަށް ވިޔަސް ބޭންކަކަށްވިޔަސް މިއިން ކޮންމެ ތަނެއްގައިވެސް ތިބީ އޭނާގެ ދަރިންކަމުގައެވެ. އަދި ތަކުރަށް ކުރެވޭނެ އެއްވެސް ކަމެއް ނޯންނާނެ ކަމަށާއި ބާރު އޮތީ އޭނާގެ އަތުގައި ކަމުގައެވެ. އަހަރެންގެ ދަރިއެއް ނެތްތާނގައި މިއުޅެނީ އިންނާނެ މީހަކުވެސް ނުވެގެންނެވެ.
އަހަރެން ބުނީމެވެ. ކޮޔާއެވެ. ތިއީ ބައެއް މީހުންނަށް ހީވެފައި އޮންނަ ކުށްހީއެކެވެ. ތިމާގެ ދަރިން، ގާތް މީހުން އެތަނެއްގައި މަސައްކަތް ކުރާނަމަ އަހަރުމެންގެ ތެރެއިންބައެއް މީހުންނަށް ހީވާނީ އެއީ ތިމާގެ އަމިއްލަ ތަނެއް ހެންނެވެ. އަދި އެތާނގައި އޮންނާނީ ތިމާގެ ބާރުކަމުގައެވެ.
އަބޫ ކުރަތެއް ކަމަކު އޭނާ އެ އުޅެނީ މާބޮޑަށް އޮޅިގެންނެވެ. އޮފީހަކަށް ވިޔަސް މުއައްސަސާއަކަށް ވިޔަސް އެތަންތާނގައި ތިބޭ މީހުންނަކީ ޢާންމު ރައްޔިތުންނަށް ޚިދުމަތް ފޯރުކޮށްދިނުމަށް ރައްޔިތުންގެ ފައިސާއިން އުޖޫރަދީފައި ތިބޭ ބަޔެކެވެ. ޚިދުމަތް ދިނުމުގައި ވަކިމީހަކު ވަކި ތަފާތެއް ނުކުރެވޭނެއެވެ. އެއީ ރައްޔިތުންގެ ޚާދިމުންނެވެ. ދިވެހި ދައުލަތުގެ ސިޓީބިޓީގައި ސޮއިކުރާ އިރު ނަމާއެކު ހައިސިއްޔަތު ބަޔާންކޮށްދޭން “ޚާދިމުކުމް” ޖަހަނީ މިހެންވެގެންނެވެ. ޚާދިމަކީ ސޮއިކުރާ މީހާއެވެ. ކުމް އަކީ އަހަރެމެން ރައްޔިތުންނެވެ.
