ޒަމާން ތަކަކަށް ފަހު ކަސްރަތު ކުލާހަށް ދިޔައީ ގައިގައި ލޮކި މަސް ޖަހައި އެކި ދިމަދިމާއިން ފިތްފިތަށް ނުކުމެ، މުޅި މީހާ ގިތޮޔޮމިރުހެއް ހެން ހީވާން ފެށުމުންނެވެ. ތަންކޮޅެއް ހިކިލައި ލޫޅާފަތި ވާނަމޭ ހިތައެވެ. ދޮރުން އެތެރެވީ ތަނާ ފެނުނީ މަދިޔަ މަކޮއެވެ. އަހަރެން ގޮސް ގޮވާލީމާ ޒާތަކަށް މޫނު ހަދާލާފައި ތުން ދަމާލިއެވެ.
އަހަރެން ބުނީމެވެ. ކޮޔާއެވެ! އެތައް ދުވަހެއް ކޮށްލާފައި ފެނުނީމާވެސް މޫނު ހުތުރު ކުރަނީ ހެއްޔެވެ؟ އަހަރެން ފެނުނީމާ ކޮއި އުފަލެއް ނުވޭ ހެއްޔެވެ؟ ކޮއި ވާހަކަ ދައްކަން ބޭނުން ނުވާ ޒާތަކަށް ހުރެ ބުންޏެވެ. ނުވެއެވެ. އަހަރެން އުފާވާނީ އަހަރެންގެ ފިކުރުގެ މީހުންދެކެއެވެ. ކަލެއަކީ އަހަރެންގެ ފިކުރުގެ މީހެއް ނޫނެވެ. އަހަރެން ވީ ޙައިރާނެއްގައި އަޖާއިބުވެގެން އަހާލީމެވެ. ދަރިޔާއެވެ. ތިޔަ ބުނަނީ ކޮން ފިކުރެއްގެ ވާހަކައެއް ހެއްޔެވެ؟ އަހަރުމެން ދެމީހުންނަކީ ނުލާހިކު ފިކުރު އެއްގޮތް ދެމީހުން ނޫން ހެއްޔެވެ. ބަލާބަލާށެވެ. ކޮއިވެސް ތިއައީ ކަސްރަތުކޮށް ހިކިގެން ޒުވާންވާށެވެ. އަހަރެންވެސް މިއައީ ހަމަ އެ ބޭނުމުގައެވެ. ކޮއި ވަރަށް ރުޅި އައިސްފައި ހުރެ ބުންޏެވެ. ދަރިޔާއެވެ. އަހަރެން މި ދައްކަނީ ތިޔަ ކަހަލަ ފިކުރެއްގެ ވާހަކައެއް ނޫނެވެ. މި ދައްކަނީ ސިޔާސީ ފިކުރުގެ ވާހަކައެވެ. ދަރިޔާއެވެ! ކަލޭ އަހަރެން ފެނުނީމާ ހިނލާފައި ވާހަކަ ދެއްކިޔަސް އަހަރުމެންގެ ފިކުރުގެ މީހުންނާ ދިމާއަށް ކަލޭމެންގެ ފިކުރުގެ މީހުން ކުރާ މަލާމާތާއި ޖެއްސުން މަ ހަނދާނެއް ނުނެތޭނެއެވެ.
އަހަރެން ޒާތަކަށް ހީނލާފައި ބުނީމެވެ. ކޮޔާއެވެ! މިހާރު ތި ދައްކަނީ ހާދަހާ ސިޔާސީ ވާހަކަ ތަކެވެ. ކޮއި ސިޔާސީ ވީ ކޮން ދުވަހަކު ހެއްޔެވެ؟ ތިޔަ އެއްޗެއް ކިޔެވީ ކޮންތާކުން ހެއްޔެވެ؟
ކޮއި ބުންޏެވެ. ދަރިޔާއެވެ! ކޮންމެހެން ސިޔާސީ ވާކަށް ވަކި އެއްޗެއް ކިޔަވަން ޖެހޭ ހެއްޔެވެ؟ މި ޤައުމުގައި ތިޔަ އެއްޗެއް ކިޔަވައިގެން ސިޔާސީ ވެގެން ތިބީ ކޮން ބައެއް ހެއްޔެވެ؟ ދެތިން ފިލްމު ގަނޑެއް ކުޅެލާފައި، ހައެއްކަ ކޮމެޑީ ޑްރާމާ ކުޅެލާފައި މާރުކޭޓުގައި ދޮން ކެޔޮ ވިއްކަން ތިބެފައި ގޮސް މަޖިލީހުން ޖާގަ ހޯދައިގެން އަރާ ކަރު ބުޑުން ހަލޭއް ލަވާފައި އައު ގުރާނަ ގޮވާލީމަ އެވީ ސިޔާސީ މީހަކަށެވެ. އޭރުން އެންމެންވެސް އަތްތިލަ ބަޑި ތަޅާނެއެވެ. ދެން އެހެންވީއިރު މަ ވަކި ސިޔާސީ ވާން އިތުރު އެއްޗެއް ކިޔަވަން ޖެހޭ ހެއްޔެވެ؟
އަހަރެން ހީލާފައި ބުނީމެވެ. އަހަރުމެންގެ މައްސަލައަކީ ތިޔައީތާއެވެ. އަހަރުމެންގެ ތެރެއިން ކޮންމެ މީހަކީ ސިޔާސީ މީހެކެވެ. ކުޑަޔަސް ބޮޑަސް ހެވެވެ. ވެރިޔާ ފޫ ބުޑުގައި ތިބެތިބެފައި އިރު ކޮޅަކުން ފެންނާނީ ޒިންމާދާރު މުއައްސަސާއެއްގެ ވެރިއެއްގެ ގޮތުގައި ހުއްޓައެވެ. ތިމާއަކީ މިކަމަށް ކުފޫ ހަމަނުވާ މީހެއްގެ ގޮތުގައި ޤަބޫލު ކުރާކަށް އެކަކުވެސް ބޭނުމެއް ނުވެއެވެ. ދެން މިހެން ތިބެތިބެފައި ތިމާގެ ފިކުރުގެ މީހުން ނޫން ބަޔަކު ހަމަ ކަމެއް ކޮށްލާއިރަށް އެވީ މީސް މީޑިއާގައި އެކަމަށް ހަޖޫ ޖަހާށެވެ. ގޮތް ކިޔާށެވެ. އެކަމަކަށް އެޅެން އޮތްހާ ހުރަހެއްވެސް އަޅާށެވެ. އެކަށީގެން ނުވާ ވަޒީފާތައް ދީފައި ތިބެނީ މި ބޭނުމުގައި ވިއްޔާއެވެ.
ކޮޔާއެވެ! ނިކަން ތެދު ޙަޤީގަތެއްގެ ވާހަކަ ބުނަން ހެއްޔެވެ؟ މިހާރު އަހަރުމެންގެ ރާއްޖޭގައި އެމީހެއްގެ އަމިއްލަ ސިކުނޑި ބޭނުން ކުރާ މީހުން ވަރަށް މަދު ވާނެއެވެ. ކޮންމެ މީހަކުވެސް ވިސްނާނީ އެމީހެއްގެ ފިކުރުގެ ރައީސްގެ ސިކުނޑިންނެވެ. އެ ވެރިޔަކު އިރު ދައްކާފައި އެއީ ހަނދޭ ބުންޏަސް ޤަބޫލު ކުރާނެއެވެ. އަހަރެން ބުނާނެ އިތުރު ވާހަކައެއް ނެތެވެ. މަށަށް އެނގޭ ކަމަކީ ސިޔާސީ ޢިލްމުގައި ކޮޔާއި މަށާ ދެމީހުންނަކީ އަލިފުބާ ވެސް ނުޖަހާ ތިބި ދެމީހުންކަމެވެ. އެކަމަކު ވެސް އަހަރެމެން ދެމީހުންގެ ވެސް ޒިންމާއެއް އެބައޮތެވެ. ގައުމު މިއޮތް ގޮތާއި، މިހެން ވާންޖެހުނު ސަބަބާމެދު ވިސްނުމެވެ. މިހާލަތުން އަރައިގަނެވޭނޭ ގޮތްތަކާމެދު ވިސްނުމެވެ. މީހުން ކިޔާއެއްޗެހީގެ ހެޔޮނުބައި ވަކިވާވަރަށް ފިކުރުހިންގުމެވެ. ގައުމުގެ ގިނަބަޔަކު މި ވިސްނުމުން ވިސްނީމާ، ކޮއި ތިބުނާ ވައްތަރުގެ ފިކުރު މަދުވެ ގައުމީ ފިކުރު އުފަންވާނެއެވެ. ތަހުޒީބު މުޖުތަމައެއް އުފަންވާނީ ގައުމީ ފިކުރުންނެވެ.
