ރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަށް އަމާޒުކޮށް ގޮއްވާލި އައިއީޑީ އަކީ 2007 ވަނަ އަހަރު ސަލްޓަން ޕާކްގައި ގޮއްވާލި އައިއީޑީއަށް ވުރެ ބާރުގަދަ އައިއީޑީއެއް ކަމަށް އެމްއެންޑީއެފުން ވިދާޅުވެއްޖެއެވެ.
މިރޭ އެމްއެންޑީއެފް އިން ބޭއްވި ބައްދަލުވުމުގައި ޗީފް އޮފް ޑިފެންސް ފޮސް މޭޖަ ޖެނެރަލް އަބްދުﷲ ޝަމާލް ވިދާޅުވީ ގޮއްވާލާފައި ވަނީ ރިމޯޓް ކޮންޓްރޯލް ޑިވައިސްއެއް ބޭނުންކޮށްގެންކަމަށެވެ. “ބޮޑަށް ބެލޭވޭ ގޮތުގައި އެ ގޮއްވާލަފައިވަނީ ފޯނަކަށް ވުރެ ބޮޑަށް ރިމޯޓް ޑިވައިސްއެއް ބޭނުން ކޮށްގެން” ޝަމާލް ވިދާޅުވިއެވެ.
އިތުރަށް ޝަމާލް ވިދާޅުވީ، ސަލްޓަން ޕާކްގެ ގޮއްވުމާ ބަލާއިރު މި ފަހަރުގެ އައިއީޑީއަކީ އެތައް ދަރަޖައެއް މަތި ގޮއްވާލުމެއްކަމަށެވެ. މި އައިޑީއަކީ މީގެ ކުރިން ރާއްޖޭގައި ގޮއްވާލާފައިވާ ޒާތުގެ އައިއީޑީތަކަށް ވުރެ ބާރުގަދަ އަދި އެތައް ދަރަޖައެއް މަތި އައިއީޑީއެއްކަން ފާހަގަކުރަމުން ޝަމާލް ވިދާޅުވީ ރޭ ގޮއްވާލީ އައިއީޑީ އަށް ވަނީ ގިނަ އަދަދަކަށް ރޭޒާ ފުށް ލާފައިކަމަށެވެ.
ރޭ، ރައީސް ނަޝީދު ދިރިއުޅުއްވާ ގެކޮޅު ކެނެރީގެއިން ނިކުމެ ވަޑައިގެން އެމަނިކުފާނުގެ ކާރުކޮޅަށް އަރުއްވަން ދަނިކޮށް ބަޔަކު އެއްޗެއް ގޮއްވާލި ހަމަލާގައި އެމަނިކުފާނަށް އެތައް ޒަހަމްތަކެއް ލިބިވަޑައިގަތުމާ ގުޅިގެން އޭޑީކޭގައި އެޑްމިޓްކޮށް ފަރުވާދެމުން އަންނައިރު އެމަނިކުފާނުގެ ހާލަތު އަދި ގޯސް ކަމަށާއި އޮންނެވީ އައިސީޔޫގައި ކަމަށް އޭޑީކޭއިން ވަނީ ބުނެފައެވެ.
