ގދ.ތިނަދޫގައި ފައްސި ވެގެން ދިޔަ ފުރަތަމަ ކޭސް އާއި އެކު ވެސް ރެޕިޑް ރެސްޕޮންސް ޓީމް އޮތީ ވަރަށް ބޮޑަށް ތައްޔާރަށެވެ. ފައްސިވާ ވަރު ދެނެގަތުމަށްޓަކައި ސާމްޕަލް ތައް ނަގަން ޓީމް ނުކުންނަނީ ޤައުމިއްޔަތުކަން އިސްކޮށް އަމިއްލަ ނަފްސަށް ބެލުމެއް ނެތިއެވެ. ކޮންޓެކް ޓްރޭސިން ހަދަން ޖެހިލުންވާ ބަޔަކަށް ކޮވިޑް ސާމްޕަލް ޓެސްޓް ހެދުމަކީ ޖެހިލުންވާން ޖެހޭ ފަދަ ކަމެއް ނޫންކަން ބަޔާންކޮށްދެނީ އޯގާތެރި ކަމާއި އެކުއެވެ.
ގދ. ތިނަދޫގެ ދޭތެރެ ދޭތެރެއިން ކޮވިޑް 19 އަށް މީހުން ފައްސިވެއެވެ. އަދި ރަށް މޮނިޓަރިން އަށްވެސް ލައެވެ. މޮނިޓަރިން އަށް ލުމަށް ފަހު މޮނިޓަރިން އުވާލަނީ އިތުރު ކޭސް އެެއް ފެންނަން ނެތުމުންނެވެ. މޮނިޓަރިން އަށް ލުމަށް ފަހު ކޮންމެ މީހެއްގެ ވެސް ސުވާލަކަށް ވެފައި އޮންނަނީ މޮނިޓަރިން އުވާލަނީ ކޮންއިރަކުން ތޯއެވެ. އާންމު ހާލަތަށް މީހުން ރުޖޫޢަ ވުމަށެވެ. ނަމަވެސް އާންމު ހާލަތައް ރުޖޫޢަ ވުމުގެ ނަތީޖާ މި އެނގެނީ ރެޕިޑް ރެސްޕޮންސް ޓީމްގެ މިންނަތް މަސައްކަތުންނެވެ. ސާމްޕަލް ނަގައި ނަތީޖާ ލިބޭ ވަރަކުންނެވެ. އާންމު ހާލަތައް ރުޖޫޢަވެ ދުވަސްކޮޅެއް ދިޔުމަށްފަހު އަނެއްކާވެސް މިވަނީ ކޮވިޑް ކޭސް ތަކެއް ތިނަދޫގައި ފެނި ރަށް މޮނިޓަރިން އަށް ލާފައެވެ. މެކުހަށް ޖަހައި ރައްޔިތުންގެ ސަލާމަތާއި ރައްކާތެރިކަން ކަށަވަރު ކޮށްދޭން ސިއްޙީ މާހިރުންނާއި އެކު ރެޕިޑް ރެސްޕޮންސް ޓީމް އޮތީ އަނެއްކާވެސް ތައްޔާރަށެވެ. ނަމަވެސް މިފަހަރު ހާލަތު ތަފާތު ވެއްޖެއެވެ. ކަންދިމާކުރި ގޮތުން މުޅި ރާއްޖޭގައި އަނެއްކާވެސް ހަލުވިކަމާއި އެކު ފެތުރެމުން މިދާ ކޮވިޑް 19 ކޭސް އެއް ތިނަދޫގައިވެސް މިފެނުނީ މި ބަރަކާތްތެރި ރަމަޟާން މަހާއި އެކުއެވެ. އެންމެ ކޭސް އެއް ނޫނެވެ. އެއް ކޭސް އާއި އެކު ރެޕިޑް ރެސްޕޮންސް ޓީމުން ނަގަމުން ދިޔަ ސާމްޕަލް ތަކުގެ ނަތީޖާ 20އިން މައްޗަށް ފައްސި ވެއްޖެއެވެ.
އެޗް ޕީ އޭ ގެ ގައިޑްލައިންގައި މާސްކް އެޅުން މަޖްބޫރު ކޮށްފައި ވާތީ ގިނަ މީހުން މާސްކް އަޅައެވެ. އާއެކެވެ! މާސްކް އެޅީމޭ ބުނަން ނޭފަތް މަތިން މާސްކް ނައްޓައި އަނގަމަތީގައި ނުވަތަ ދަތްދޮޅި މަތީގައި މާސްކް އަޅާފައި ހުންނަލެއް މަދެއް ނޫނެވެ. ގިނަ ބަޔަކު ބުނާގޮތުން ނޭވާ ހާސްވާހެންވެސް ހީވާތީއެވެ. ސުވާލަކީ ޜެޕިޑް ރެސްޕޮންސް ޓީމުން އެލާފައި ހުންނަ ކިޓަކީ ލައިން ހުންނަން ފަސޭހަ ކިޓަކަށް ވާނެ ހެއްޔެވެ. ގިނަ މީހުން މިއުޅެނީ އަވި ގަދަ ދުވަހަކު ބޯ ފޮތީގެ ހެދުމެއް ނޫނީ ގަމީހެއް ލައިންވެސް ކެތްނުކުރެވިގެންނެވެ. ހެދުންމަތިން ކިޓް ލައިގެން މާސްކް އަޅައިން ޜެޕިޑް ރެސްޕޮންސް ޓީމް އެނުކުންނަނީ ހަމަ ތިޔަ ރައްޔިތުންގެ ހައްޤުގައެވެ. ހޮސްޕިޓަލުގައި ރައްޔިތުންގެ ހައްޤުގައި އަދާ ކުރަންޖެހޭ ޑިއުޓީ އަދާކޮށްފައި ސާމްޕަލް ނަގަން ޓީމުން ނުކުންނަނީ ޝަކުވާއެއް ނެތި ހަމަ ތިޔަ ރައްޔިތުންގެ ހައްޤުގައެވެ. ރޯދައަށް ތިބެ ބަނދިގޭ މަސައްކަތް ކޮށްލައި ރޯދަވީއްލުމަށްފަހު ތަރާވީސް ކޮށްލައިގެން ރައްޔިތު މީހާ ބަނޑުދަމާލަން އޮށޯވެލާ ވަގުތު ރެންޑަމް ސާމްޕަލް ނަގަން ތަނެއްގައި ބުރަކަށި ޖައްސާލުމެއް ނެތި ނުކުންނަ ރެޕިޑް ރެސްޕޮންސް ޓީމަށް ސަނާ ހައްޤެވެ. އެކުރާ ބުރަ މަސައްކަތުގެ އަގު ރައްޔިތުމީހާ އަށްވެސް އަދާ ކޮށްދެވުން ކަމުގައި ވާނީ ފަރުދީ ޒިންމާ އަދާކޮށް ޒަރޫރީ ބޭނުން ތަކަށް ނޫން ގޮތަކަށް ބޭރަށް ނުގޮސް ގޭގައި މަޑުކޮށްގެންނެވެ. ކޮންޓެކްސް ތައް މަދު ކޮށްގެންނެވެ. ހޯމް ކަރަންޓީން ގެ އުސޫލަށް އަމަލު ކޮށްގެންނެވެ. އެންމެހާ ރައްޔިތުންނަށް ސަލާމަތާއި ރައްކާތެރިކަން ލައްވާށި! އާމީން!
