އެމްއެމްޕީއާރްސީގެ ބޮޑު ހިޔާނާތާއި ގުޅުންހުރި މައްސަލަތަކެއްގައި ދައުވާ ކޮށްފައިވާ ޕީޕީއެމް ޕާލަމެންޓްރީ ގްރޫޕްގެ ކުރީގެ ލީޑަރު އަދި ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ހުސައިން މަނިކުގެ ޝަރީއަތް ކުރިއަށްގެންދަން ބޭނުންވާ ބައެއް ލިޔެކިޔުންތައް ނުލިބޭތީ މިއަދު ޝަރީއަތް ކެންސަލް ކޮށްފި އެވެ.
ކްރިމިނަލް ކޯޓުގައި މިއަދު ކުރިއަށް ގެންދިޔަ އިބްތިދާއީ އަޑުއެހުން ނިންމާލީ ނިހާންގެ މައްސަލަ އެހެން ސެކްޝަނަކަށް ބަދަލުވެފައި ވީނަމަވެސް އެކަން އެންގުމުގެ ލިޔުން އޭނާއަށް ލިބިފައި ނުވާތީ އެވެ. އެހެންކަމުން އެކަން އެންގުމުގެ ސިޓީގެ އިތުރުން ބައެއް ލިޔެކުޔުންތައް ސާފުނުވާ ކަމަަށް ނިހާންގެ ފަރާތުން ބުނުމުން މިއަދުގެ އަޑުއެހުން ވަނީ އެހެން ދުވަހަކަށް ފަސް ކޮށްފަ އެވެ.
ނިހާންގެ މައްޗަށް ހަ ދައުވާއެއް ކޮށްފައިވާއިރު އޭގެ ތެރޭގައި ހިމެނެނީ ރިޝްވަތު ހިފުމުގެ ތިން ދައުވާއަކާއި ރިޝްވަތު ދިނުމުގެ ދެ ދައުވާއެއްގެ އިތުރުން މަނީ ލޯންޑަރިންގެ ދައުވާ އެކެވެ.
މި މަހުގެ 11 ވަނަ ދުވަހުވެސް ނިހާނުގެ ޝަރީއަތުގެ އަޑުއެހުމެއް ބާއްވާފައިވާއިރު އެދުވަހު ދައުލަތުން އަލުން އެދިގެން، ކޯޓުން ވަނީ އޭނާގެ ޕާސްޕޯޓު ހިފަހައްޓަން އަމުރު ކޮށްފަ އެވެ.
