އިސްލާމީ މަރުކަޒުގެ މަސްޖިދުލްސުލްތާން މުހައްމަދު ތަކުރުފާނުލް އައުޒަމަށް ބަރަހަނާ ހާލުގައި ވަން ބިދޭސީ މީހާއަކީ ނަފްސާނީ މައްސަލަ ހުންނަ މީހެއް ކަމަށް ފުލުހުން ބުނެފިއެވެ.
މިދިޔަ ބުރާސްފަތި ދުވަހުގެ ރޭގެ އިޝާ ނަމާދަށް ފަހު ބަރަހަނާ ހާލުގައި ހުރި ބަންގްލަދޭޝް މީހަކު އިސްލާމީ މަރުކަޒަށްވަދެ މިސްކިތުގައި ހުރި ބައެއް ތަކެއްޗަށްވަނީ ގެއްލުން ދީފައެވެ. މިސްކިތުގައި ތިބި މީހުން އެ މީހާ މިސްކިތުން ނެރުމަށް މަސައްކަތްކުރާ މަންޒަރު ފެންނަ ވީޑިއޯއެއްވެސް އާންމުވެފައިވާއިރު އެރޭ ފުލުހުން ވިދާޅުވީ އެކަމާއި ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.
އެކަމާއި ގުޅިގެން އިތުރު މައުލޫމާތު މީޑިއާ އަށް ހިއްސާ ކުރައްވަމުން ފުލުހުން ވިދާޅުވީ އެ މައްސަލާގައި ފުލުހުންގެ ބެލުމުގެ ދަށަށް ގެނައި މީހާއަކީ ނަފްސާނީ މައްސަލަތަކެއް ހުންނަ މީހެއް ކަމަށް ފުލުހުންނަށް މިހާތަނަށް ބެލި ބެލުމުން އެނގިފައިވާކަމަށެވެ. އަދި އެމީހާ މިހާރު ދޫކޮށްލާފައިވާ ކަމަށްވެސް ފުލުހުންވަނީ ވިދާޅުވެފައެވެ.
އިތުރަށް ފުލުހުން ވިދާޅުވީ އޭނާގެ ސްޕޮންސާ އާއި ގުޅިގެން އޭނާ ބަންގްލަދޭޝް އަށް ފޮނުވާލުމުގެ މަސައްކަތް ކުރަމުން އަންނަކަމަށެވެ.
