ޔުނައިޓެޑް ޢަރަބް އެމިރޭޓްސް (ޔޫ.އޭ.އީ) އިން ކޮންމެ އަހަރަކު ދެމުންދާ ‘ޒައިދް ސަސްޓެއިނަބިލިޓީ ޕްރައިޒް’ގެ 2022 ވަނަ އަހަރުގެ އިނާމަށް ނަން ހުށަހެޅުމުގެ ފުރުސަތު ހުޅުވާލައިފިއެވެ.
މި އިނާމަކީ 2008 ވަނަ އަހަރު ތަޢާރަފުކޮށް ޞިއްޙީ، ކާބޯތަކެތި، ހަކަތަ، ފެން އަދި މަތީ ސާނަވީ މަދަރުސާތައް ދާއިރާއިން، އެ ދާއިރާތައް ދެމެހެއްޓެނިވި ގޮތެއްގައި ކުރިއެރުވުމަށްޓަކައި އެކި ފަރާތްތަކުން ކޮށްފައިވާ އުފެއްދުންތެރި މަސައްކަތްތަކުގެ އަގު ވަޒަންކޮށް އެކަންކަން ފާހަގަކުރުމަށް ދެމުންދާ އިނާމެކެވެ.
‘ޒައިދް ސަސްޓެއިނަބިލިޓީ ޕްރައިޒް’ އިން ބުނީ މި އިނާމަށް ނަން ހުށަހެޅުމުގެ ފުރުސަތު 06 މޭ 2021 ވަނަ ދުވަހާ ހަމައަށް ހުޅުވާލާފައިވާކަމަށެވެ. ފާއިތުވެދިޔަ 12 އަހަރު 86 ފަރާތަކުން ވަނީ މި އިނާމް ކާމިޔާބުކޮށްފައެވެ. އަބޫދާބީ ސަސްޓެއިނަބިލިޓީ ވީކް ގެ ނަމުގައި ހިންގާ މި ހަރަކާތަކީ ކޮންމެ އަހަރަކު މެދުއިރުމަތީގައި ބާއްވާ އެންމެ ބޮޑު އެއް އެއްވުމެވެ. 2019 ވަނަ އަހަރު ރައީސް އިބްރާހީމް މުހައްމަދު ސޯލިހްވަނީ ‘ޒައިދް ސަސްޓެއިނަބިލިޓީ ޕަރައިޒް” އެވޯޑް ހަފްލާގައި ބައިވެރިވެފައެވެ.
މިކަމާ ގުޅޭ އިތުރު މަޢުލޫމާތު www.zayedsustainabilityprize.com ވެބްސައިޓުން ލިބެން ހުންނާނެއެވެ.
