ސަދަން ކޮމިޔުނިޓީ އެމްޕަވަރމެންޓް އެސޯސިއޭޝަން (ސްކީމް) ގެ ގއ.އަތޮޅު ޗެޕްޓަރ އާއި އޭއޯ ނިއުސް ގުޅިގެން ގއ. ގެމަނަފުށި އަދި ވިލިގިނލީގައި ކުރިއަށް ގެންދިޔަ ބޭސިކް ޖާނަލިޒަމް ކޯހުން އެއްވަނަ ގއ ގެމަނަފުށި އާބާދުގެ އާމިނަތު ނީނާ އާއި ގއ. ވިލިނގިލި ޕެރިސްރޯސްމާގެ އައިޝަތު ނަޒްދާ ހޯދައިފިއެވެ.
ނޮވެމްބަރު މަހުގެ 22 ވަނަ ދުވަހުން ފެށިގެން ޑިސެމްބަރު މަހުގެ 8 ވަނަ ދުވަހުގެ ނިޔަލަށް ގއ އަތޮޅުގައި ކުރިއަށް ގެންދިޔަ ބޭސިކް ލެވެލް ގެ މި ޕްރޮގްރާމުގައި ގެމަނަފުށިން 25 ޒުވާނަކު ބައިވެރިވެފައިވާއިރު ވިލިގިނލިން 22 ޒުވާނުން ވަނީ ބައިވެރިވެފައެވެ.
މި ކޯހުން ގެމަނަފުށީ ކުލާހުން 1 ވަނަ ނީނާ ހޯދާފައިވާ އިރު އެ ކްލާހުން ދެވަނަ ހޯދާފައިވަނީ ގެމަނަފުށީ އިރުފޮހޭގޭ މަރިޔަމް ޔަޝްމީ ހަސަން އެވެ. އަދި 3 ވަނަ ހޯދާފައިވަނީ އެ ރަށު ދިޔަދޫގޭ ފާތިމަތު އާތިފާ ޙަސަން އާއި ޕެރެޑައިސް އައިޝަތު މީސަމް މުޙައްމަދެވެ.
ވިލިނގިލީ ކުލާހުން 1 ވަނަ ނަޒްދާ ހޯދި އިރު 2 ވަނަ ހޯދާފައިވަނީ ވިލިނގިލީ ސިލްވާ ވިލާ އިބްރާހިމް ރަޝީދެވެ. އަދި 3 ވަނަ ހޯދާފައިވަނީ އެރަށު ފޮރިންވިންޑް މަރިޔަމް ނިޔާޒާ އެވެ.
މި ކޯހުން 1 ވަނަ ހޯދި ދެ ދަރިވަރުންނަށް ވަނީ އިންޑިއާގެ ދިއްލީގައި ޖާނަލިޒަމް އިންޑިޕްލޮމާ ފުރިހަމަ ކުރުމަށް ސްކޮލަރޝިޕް ފުރުސަތު ހޯދާދީފައެވެ.
ސްކީމާއި އޭއޯ ނިއުސް ގުޅިގެން ކުރިއަށް ގެންދިޔަ ދެކުނުގެ 4 އަތޮޅުގައި ކުރިއަށް ގެންދިޔަ ސިލްސިލާ ކޯސް ތަކުގެ މަގުޞަދަކީ ދެކުނުގެ 4 އަތޮޅުގެ ޒުވާނުންގެ ތެރެއިން ނޫސްވެރިކަމުގެ ދާއިރާއިން ކުރިއަށް ދިއުމަށް ބޭނުންވާ ފަރާތްތަކަށް އެ ފުރުސަތު ހޯދައިދީ އަމަލީ މައިދާނުގައި މަސައްކަތް ކުރާނެ ޕްލެޓްފޯމެއް ހޯދައިދިނުމެވެ. އަދި އެ ރޮނގުން މަތީ ތައުލީމު ހާސިލް ކުރުމަށް ބޭނުންވާ ޒުވާނުންނަށް އެ ފުރުސަތުވެސް ފަހި ކޮށްދިނުމެވެ.
އެގޮތުން ކުރިއަށް ގެންދިޔަ ކޮންމެ ކުލާހަކުން 1 ވަނަ ހޯދި ދަރިވަރުންނަށް ވަނީ ނޫސްވެރިކަމުގެ ދާއިރާއިން ރާއްޖެއިން ބޭރުން މަތީ ތައުލީމު ހޯދުމުގެ ފުރުސަތު ހޯދައިދީފައެވެ،
މި ޕްރޮގްރާމުގައި ފެސިލިޓޭޓަރެއްގެ ގޮތުގައި މަސައްކަތް ކޮށްދެއްވެވީ އޭއޯ ނިއުސްގެ ފައުންޑަރ އަދި ޗީފް އެޑިޓަރ ޝިމްލާ އަޙްމަދެވެ. މީގެ އިތުރުން އޭއޯ ނިއުސްގެ ސީނިއާރ ސްޓާފުންނާއި މޯލްޑިވްސް މީޑިއާ ކައުންސިލުން ވަނީ ބައެއް ސެޝަންތައް ދަރިވަރުންނަށް ނަގައިދީފައެވެ.
ދެކުނުގެ 4 އަތޮޅުގައި ކުރިއަށް ގެންދިޔަ މި ޕްރޮގްރާމު ތަކުގައި މުޅިއެކު 115 ޒުވާނުން ދާއިރާއަށް ތަމްރީނު ކޮށްފައިވާއިރު ކޮންމެ އަތޮޅެއްގައި ވަނީ އޭއޯ ނިއުސްގެ ބިއުރޯއެއް ހުޅުވައި އެތަނުގައި މަސައްކަތް ކުރާނެ ފުރުސަތު ދަރިވަރުންނަށް ހޯދައިދީފައެވެ.
