މުޅި ދުނިޔޭން ކޮރޯނާވައިރަސް (ކޮވިޑް-19) މިހާރު އެންމެ ބޮޑަށް ފެތުރެމުންދާ އެމެރިކާގައި ސްކޫލްތައް ހުޅުވުމާ ދެކޮޅަށް އެ ގައުމުގެ 35 ޑިސްޓްރިކްޓެއްގެ ސްކޫލްތަކަށް ނިސްބަތްވާ ޓީޗަރުންނާއި ސަޕޯޓް ސްޓާފުން އަޑުއުފުލައިފިއެވެ.
އެގޮތުން. އެ ގައުމުގެ ގިނަ އަދަދެއްގެ ޓީޗަރުން ގަބޫލުކުރާ ގޮތުގައި މިހާރުގެ ހާލަތު ރަނގަޅުނުވަނީސް ސްކޫލްތައް ހުޅުވުމަކީ މި ބައްޔަށް އިތުރަށް މީހުން ހުށަހެޅުމުގެ ފުރުޞަތު ބޮޑުވާނެކަމަކަށްވާއިރު، އެންމެ ރަނގަޅު ގޮތަކީ ސައިންޓިފިކް ޑޭޓާގެ މައްޗަށް ރިއާޔަތްކޮށް މިކަމަށް އެކަށޭނަ ދަނޑިވަޅު އަންނަންދެން މަޑުކުރުން ކަމަށެވެ.
އަދި ސްކޫލްތަކުގައި ސަލާމަތީ ޕްރޮޓޮކޯލްތައް ކަނޑައެޅި މިހާރަށްވުރެ ގިނައިން ޓެސްޓްކުރެވޭނެ ނިޒާމެއް ގާއިމްކޮށް އެކަށީގެންވާ ވަރަށް ކައުންސިލަރުންނާއި ނަރުހުން ވެސް ހަމަޖެހިގެން މެނުވީ ހުޅުވުމަކީ އެންމެ ރަނގަޅު ގޮތް ކަމަށް ގަބޫލުނުކުރާކަމަށް ވެބްސައިޓް މެދުވެރިކޮށް ޓީޗަރުން ވަނީ ހާމަކޮށްފައެވެ.
މީގެއިތުރުން، ސްކޫލްތަކުގެ ދަރިވަރުންގެ ބެލެނިވެރިންނާއި، މައިންބަފައިންނަށް ލިބެންޖެހޭ އެހީތެރިކަން ފޯރުކޮށްދިނުމަށާއި، ހާއްސަކޮށް ގޭގެ ކުލި ދެއްކުމަށާއި މޯގޭޖަށް މާލީގޮތުން އެހީވުމަށްޓަކައި މޮރަޓޯރިއަމް ތައާރަފްކުރުމަށް ވެސް ގޮވާލާފައިވެއެވެ.
އެމެރިކާގައި ކޮވިޑް-19 އަށް މިހާތަނަށް 4.8 މިލިއަން މީހުން ޕޮޒިޓިވްވެ، 158.522 މީހުން ވަނީ މަރުވެފައެވެ. އެ ގައުމުން މިހާތަނަށް ރަނގަޅުވެފައިވާ މީހުންގެ އަދަދަކީ 2,382,805 އެވެ. މުޅި ދުނިޔޭން މިހާތަނަށް 18.3 މިލިއަން މީހުން މި ބައްޔަށް ޕޮޒިޓިވްވެ، 694،874 މީހުން ވަނީ މަރުވެފައެވެ.
