ކޮވިޑް19 ގެ ސަބަބުން ވަގުތީ ގޮތުން ރާއްޖޭގެ ބޯޑަރުތައް ބަންދުކޮށްފައި އޮތުމަށް ފަހު އަލުން ހުޅުވިނަމަވެސް މީގެ ކުރިން އައްޑޫ އިންޓަނޭޝަނަލް އެއާރޕޯޓަށް ސްރީލަންކަން އެއާލައިނުން ކުރަމުން އައި ސީދާ ދަތުރު ތައް ކުރެވޭނެ ކަމުގެ ޔަގީން ކަން ނެތް ކަމަށް އެއާލައިންސްގެ ރާއްޖޭގެ އޮޕަރޭޓަރު އޭސް އޭވިއޭޝަން މޯލްޑިވްސްގެ މެނެޖިން ޑިރެކްޓަރު މުހައްމަދު ފިރާގު (އިނަ މޯލްޑިވްސް ފިރާގު) ވިދާޅުވެއްޖެއެވެ.
ދަތުރު ތަކާ ބެހޭ ގޮތުން ސޯޝަލް މީޑިއާގައި ކަންބޮޑުވުން ފާޅުކުރައްވަމުން ފިރާގު ވިދާޅުވެފައިވަނީ ރާއްޖޭގެ ބޯޑަރު ހުޅުވި ކަމުގައި ވީނަމަވެސް ކޮލޮމްބޯއިން ގަމަށް ކުރާ ދަތުރުތައް ކުރުމަށް އަދި އެއްވެސް ގޮތެއް ނިންމާފައި ނުވާކަމަށެވެ.
ކޮލަމްބޯއިން ގަމަށް ހަފްތާއަކު 3 ދަތުރު ކުރަމުން އައި ސްރީ ލަންކަން އެއާލައިންސްގެ ދަތުރުތައް އަލުން ފެށޭނެ ކަމުގެ ޔަގީންކަން ނެތް ކަމަށް ފިރާގުވަނީ ވިދާޅުވެފައެވެ. ސަބަބެއް ކަމަށް ވިދާޅުވެފައިވަނީ ފާއިތުވި ތިން އަހަރުގެ ތަޖުރިބާ އާއި ލިބުނު ގެއްލުމަށް ބަލާފައި އެކަށީގެންވާ ވަރަށް ފަސިންޖަރުން ނުލިބޭތީ ކަމަށް އޭނާ ވިދާޅުވެއެވެ.
ފިރާގު ވިދާޅުވެފައިވަނީ ހުވަދު އަތޮޅާއި އައްޑޫ ގަމާއި ދެމެދު ޝެޑިއުލް ޑޮމެސްޓިކް ފްލައިޓުން ގުޅާލެވޭނެ ރަނގަޅު އިންތިޒާމެއް ހަމަޖެހިއްޖެ ނަމަ އަދިވެސް އިންތިޒާރު ކުރަނީ ދަތުރުތައް ފެށިގެން ދާނެ ކަމަށް ކަމަށެވެ. އަދި މިފަދަ ހާލަތެއް މެދުވެރި ވެއްޖެ ނަމަ ގައުމީ އެއާރލައިގެ އިންޓަނޭޝަނަލް ތަދުރުތައްވެސް ގަމަށް ފެށިދާނެ ކަމަށް ދެކިލައްވަވާ ކަމަށް ފިރާގު ވަނީ ވިދާޅުވެފައެވެ.
ސްރީލަންކަން އެއާލައިނުން އައްޑޫއަށް ކުރާ ދަތުރުތައް ހުއްޓާލުމާ ގުޅޭ ވާހަކަތަކެއް މިއަހަރުގެ ކުރީކޮޅުވެސް ވަނީ ދެކެވިފައެވެ. އައްޑޫ ސިޓީ ގަމުން ސްރީލަންކާ އަށް ދަތުރު ފެށިތާ ދެ އަހަރު ވެފައިވާއިރު ފުލް ފްލެޖު އެއާޕޯޓަކުން ލިބެންޖެހޭ ހިދުމަތްތައް ގަން އެއާޕޯޓުން ނުލިބޭކަމަށް ސްރީލަންކަން އިން ބުނާ ކަމަށް ފިރާގު ވަނީ މިއަހަރުގެ ޖެނުއަރީ މަހު ވިދާޅުވެފައެވެ.
ސްރީލަންކަން އިން އައްޑޫ ސިޓީ ގަމަށް ދަތުރު ފެށާފައިވަނީ 2016 ވަނަ އަހަރުގެ ޑިސެމްބަރުގައެވެ.
ރައީސް ޔާމީނުގެ ސަރުކާރުގައި ކޮލޮމްބޯ އާއި ގަމާ ދޭތެރޭގެ ދަތުރުތައް ފައްޓާފައިވަނީ އެ ދަތުރުތަކުގެ ސަބަބުން އައްޑޫ ސިޓީ އާއި ދެކުނު ގައި ދިރިއުޅޭ ރައްޔިތުންނަށް ރާއްޖެއިން ބޭރަށް ދަތުރު ކުރުމުގައި އިތުރު ލުއިތައް ހޯދާދިނުމުގެ މަގުސަދުގައްޔާއި އަދި އެ ސަރަޙައްދުގެ ޓޫރިޒަމް އިތުރަށް ވަރުގަދަކޮށް ތަރައްގީ ކުރުމާއި ވިޔަފާރިތަކަށް ވެސް ލުއި ފަސޭހަތައް ހޯދައިދިނުމުގެ މަގުސަދުގައެވެ.
