ބޮޑު މެދުކެނޑުމަކަށް ފަހު ފަށާފައިވާ ސްޕެނިޝް ލީގުގައި ގަދަފަދަ ބާސެލޯނާ ކުޅުނު ފުރަތަމަ މެޗުގައި ރޭ ރަށުން ބޭރުގައި މަޔޯކާ އަތުން 4-0 އިން މޮޅުވިއިރު، އެ ޓީމުގެ ކެޕްޓަން ލިއޮނަލް މެސީ އިތުރު ރެކޯޑެއް ގާއިމްކޮށްފިއެވެ.
ރޭގެ މެޗުގައި ބާސެލޯނާ އިން ޖެހި ހަތަރުގެ ގޯލްގެ ތެރެއިން ފަހު ލަނޑުޖަހައިދިން މެސީ ވަނީ އެ ގޯލާއެކު ސްޕެނިޝް ލަލީގާގައި ވިދިވިދިގެން 12 ސީޒަނުގައި 20 ގޯލް ހަމަކުރި ހަމައެކަނި ކުޅުންތެރިޔާގެ ޝަރަފު ހޯދާފައެވެ.
ލީގުގައި ރޭ ކުޅުނު މެޗުތަކަށްފަހު 61 ޕޮއިންޓާއެކު ތާވަލްގެ އެއްވަނައިގައި އުޅެނީ ބާސެލޯނާ އެވެ. އޭގެ ފަސް ޕޮއިންޓް ފަހަތުން ދެވަނައިގައި ރެއާލް މެޑްރިޑް އޮތްއިރު، 50 ޕޮއިންޓާއެކު ތިންވަނައިގައި އޮތީ ސެވިއްޔާ އެވެ. ފައިދާ ގޯލްގެ ތަފާތުން އެއް މެޗު މަދުން ކުޅެގެން 46 ޕޮއިންޓާއެކު ރެއާލް ސޮސިއެޑާޑް ހަތަރުވަނައިގައި އޮތްއިރު ފަސްވަނައިގައި އޮތް ގެޓަފޭ އަށް ވެސް މި އަދަދަށް ޕޮއިންޓް ލިބިފައިވެއެވެ.
މަޔޯކާގެ ދަނޑުގައި ރޭ ކުޅުނު މެޗު ފެށިތާ 65 ވަރަކަށް ސިކުންތުގެ ތެރޭގައި ބާސެލޯނާ އަށް ލީޑްނަގައިދިނީ ޗިލީގެ އިތުބާރު މިޑްފީލްޑަރު އާތުރޯ ވިޑާލް އެވެ. މިއީ އެ ޓީމުގެ ސްޕެއިން ފުލްބެކް ޖޯޑީ އަލްބާ ތަނަވަސްކުރި ފުރުޞަތަކުން ލިބުނު ބޯޅައެއް ވިޑާލް ބޮލުން ފޮނުވާލައިގެން ކާމިޔާބުކުރި ގޯލެކެވެ.
ފުރަތަމަ ހާފު ނިމެން ހަތް މިނެޓަށްވެފައިވަނިކޮށް ބާސެލޯނާގެ ދެވަނަ ލަނޑުޖަހައިދިނީ މެސީ ދިން ޕާހަކުން ކުރިން ލެގަނޭސް އަށް ކުޅުނު ޑެންމާކްގެ ފޯވާޑް މާޓިން ބްރެއިތުވެއިޓް އެވެ. މިއީ ހާއްސަ ހުއްދައެއްގެ ދަށުން ބަދަލުވި ބްރެއިތުވެއިޓް އެ ޓީމަށް ޖަހައިދިން ފުރަތަމަ ގޯލެވެ. ފޯވާޑެއް ގެނައުމަށް ބާސެލޯނާ އަށް ހާއްސަ ހުއްދައެއް ލިބުނީ އެ ޓީމުގެ ފްރާންސް ފޯވާޑް އޮސްމާނެ ޑެމްބެލޭ އަށް ލިބުނު އަނިޔާގެ ސަބަބުން މި ސީޒަނުގައި ނުކުޅެވޭނެކަން ކަށަވަރުވިއިރު، އުރުގުއޭގެ ފޯވާޑް ލުއިސް ސުއަރޭޒް ވެސް އެވަގުތު އަނިޔާގައި ހުރުމުންނެވެ.
ރޭގެ މެޗުގެ ފުރަތަމަ ހާފުގައި މަޔޯކާ އަށް ލަނޑުޖެހުމަށް ރަނގަޅު ތިން ފުރުޞަތެއް ލިބިފައިވާއިރު، އެ ޓީމުގެ ޖަޕާނު ފޯވާޑް ޓަކެފޫސޯ ކޫބޯ ފޮނުވާލި ތިން ހަމަލާގެ ވެސް ހުރަހަކަށްވީ ބާސެލޯނާގެ ޖަރުމަން ގޯލްކީޕަރު މާކް އަންދްރެ ޓަ ސްޓެގަން އެވެ.
މި މެޗުގައި ބާސެލޯނާ އިން ޖެހި ތިންވަނަ ލަނޑު، މެޗު ނިމެން 11 މިނެޓަށްވެފައިވަނިކޮށް މެސީ ދިން ބޯޅައަކުން ކާމިޔާބުކޮށްދިނީ އަލްބާ އެވެ. އަދި މެޗުގެ އިތުރުވަގުތުގެ ތިންވަނަ މިނެޓުގައި މި ހާފުގައި ކުޅެން ނިކުތް ސުއަރޭޒް ދިން ބޯޅައަކުން އެ ޓީމުގެ ފަހު ލަނޑުޖަހައިދިނީ މެސީ އެވެ.
މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، އަލަވޭސް އަތުން އަމިއްލަ ދަނޑުގައި 2-0 އިން އެސްޕަންޔޯލް މޮޅުވިއިރު، ވިޔަރެއާލް ވަނީ ރަށުން ބޭރުގައި 1-0 އިން ސެލްޓާ ވިގޯ ބަލިކޮށްފައެވެ. ލެގަނޭސް ވަނީ އަމިއްލަ ދަނޑުގައި 2-1 އިން ރެއާލް ވަޔަޑޮލިޑް އަތުން ބަލިވެފައެވެ.
ލަލީގާ ގައި މިއަދާ މިރޭ ކުޅުމަށް ހަމަޖެހިފައިވާ މެޗުތަކަށް ބަލާއިރު، ރާއްޖޭގަޑިން ހަވީރު 17:00 ގައި ފަށާ މެޗުގައި އެތުލެޓިކް ބިލްބާއޯއާ ދެކޮޅަށް އެތުލެޓިކޯ މެޑްރިޑް ނިކުންނައިރު، މިރޭ 22:30 ގައި ކުޅޭ މެޗުގައި އަމިއްލަ ދަނޑުގައި ރެއާލް ނިކުންނާނީ އެއިބާއާ ދެކޮޅަށެވެ.
