ގިނަ އަދަދެއްގެ ޕްލާސްޓިކް ޝީޓްތަކެއް އޮޔާދާތީ ސަމާލުވުމަށް އެމްއެންޑީއެފުން އިލްތިމާސްކޮށްފި އެވެ.
އެމްއެންޑީއެފުން މިރޭ ބުނީ މިއަދު އައި ބާރުގަދަ ކޮޅުގަނޑެއްގައި، ކ. ގުޅިފަޅުގައި ބޭނުންކުރަމުންދިޔަ 20 ފޫޓުގެ ގިނަ އަދަދެއްގެ ޕްލާސްޓިކް ޝީޓްތަކެއް ކަނޑަށް ދޫވެފައިވާ ކަމަށެވެ.
Miadhu ai baarugadha kolhigandehgai, K.Gulhifalhugai beynun kuramundhiya 20ft ge gina adhadhehge plastic sheet thakeh kan’dah dhoove, Villimale’ aai Male’ aa dheytherein iru uthurah oyaa dhaathee, e sarahahdhun dhathurukuravvaa faraaiythakun samaaluvumah ilthimaas kuran.
— Maldives National Defence Force (@MNDF_Official) June 13, 2020
އަދި އެ ޝީޓްތައް ވިލިމާލެ އާއި މާލެ އާއި ދޭތެރެއިން އިރު އުތުރަށް އޮޔާދާތީ، އެ ސަރަޙައްދުން ދަތުރުކުރާ ފަރާތްތަކުން އެކަމަށް ސަމާލުވުމަށް އެމްއެންޑީއެފުން ވަނީ އިލްތިމާސްކޮށްފަ އެވެ.
ރާއްޖޭގެ އެކި ހިސާބުތަކަށް މިހާރު ވިއްސާރަ ކުރަމުންދާއިރު، ވައިގަދަވެ މާލޭ ކުޅިވަރު އެކުވެނީގެ ފުރާޅުން ބައެއްވެސް ވަނީ އެއްލާލައިފަ އެވެ. މީގެ އިތުރުން މާލޭގައި ހަދަމުންދާ އިމާރާތެއްގެ ފާރެއްވެސް ވެއްޓި، ދެ ގެއަކަށް ވަނީ ގެއްލުންވެފަ އެވެ.
މިއަދާއި މާދަންވެސް ރާއްޖޭގެ އެކި ހިސާބުތަކަށް ވިއްސާރަކުރާނެތީ، މެޓް އޮފީހާއި ފުލުހުންގެ އިތުރުން އެމްއެންޑީއެފުންވެސް ވަނީ މޫސުމަށް ސަމާލުވުމަށް އަންގައިފަ އެވެ.
