އަންނަ އަންގާރަ ދުވަހުން ފެށިގެން ރާއްޖޭގެ އެކި ހިސާބުތަކަށް ވައިބާރުވެ، ކަނޑުތައް ވަރަށް ބޮޑަށް ގަދަވާން ފަށާނެ ކަމަށް މޫސުމާ ބެހޭ ގައުމީ އިދާރާ (މެޓް އޮފީހުން) މިއަދު ބުނެފި އެވެ. ކުރިއަށް އޮތް ފަސް ދުވަހު ވެސް މުޅި ރާއްޖެއަށް ވިއްސާރަކުރާނެ ކަމަށް ވަނީ ލަފާކޮށްފަ އެވެ.
މެޓް އޮފީހުން ބުނީ, ކުރިއަށް އޮތް 24 ގަޑިއިރު ރާއްޖޭގެ ބައެއް ހިސާބުތަކަށް ބޯކޮށް ވާރޭވެހުން އެކަށީގެންވާކަމަށެވެ. އަދި ބައެއް ސަރަހައްދުތަކަށް ކެރީގެ އަސަރު ފޯރާނެ ކަމަށާއި، ވަޔާއި ކަނޑު އާންމުކޮށް މަޑުވި ނަމަވެސް ވިލާގަނޑުގައި ގަދަވާނެ ކަމަށް ވެސް އޮފިޝަލް ވިދާޅުވި އެވެ.
އިއްޔެއިން ފެށިގެން ދެކުނާއި އުތުރުގެ އަތޮޅުތަކަށް ވިއްސާރަ ކުރަމުން އަންނައިރު، މޫސުމީ ލަފާކުރުންތަކުން ދައްކާ ގޮތުގައި މާދަމާ ހެނދުނުން ފެށިގެން މާލެއަށް ވެސް ވަރަށް ބޮޑަށް ވިއްސާރަކުރާނެ އެވެ. އަދި އަންގާރަ ދުވަހުން ފެށިގެން ވައިގަދަވެ ކަނޑުތައް ގަދަވާން ފަށާނެ ކަމަށް ވަނީ ބުނެފަ އެވެ.
