އަވަށްޓެރި ސްރީ ލަންކާ އާއި މެލޭޝިއާގައި ތާށިވެފައި ތިބި ބައެއް ދިވެހިން ރާއްޖެ ގެނައުމަށް އަންނަ ހަފްތާގައި ފްލައިޓެއް ބާއްވަން ރާއްޖޭގެ ޤައުމީ އެއާލައިން، މޯލްޑިވިއަނުން ނިންމައިފި އެވެ.
މޯލްޑިވިއަނުން ރޭ ކުރި ޓްވީޓެއްގައި ބުނެފައި ވަނީ ލަންކާގެ ވެރިރަށް ކޮލޮމްބޯގައި ތިބި ދިވެހިން ގެނައުމަށް ޖޫން 12 އަށް ފްލައިޓެއް ތާވަލްކޮށްފައިވާއިރު، ކުއަލަ ލަމްޕޫރުން ދިވެހިން ގެނައުމަށް ޖޫން 15 އަދި 17 ވަނަ ދުވަހަށް ފްލައިޓް ތާވަލްކޮށްފައިވާ ކަމަށެވެ.
މޯލްޑިވިއަނުން ބުނީ އެ ފްލައިޓްތަކުން އަންނަން ބޭނުންވާ ފަރާތްތަކުން، ދަތުރު ފެށުމުގެ ކުރިން ރަށަށް އައިސް ގޭގައި ކަރަންޓީނުވެވޭނެ ނުވަތަ އެކަހެރިވެވޭނެ އިންތިޒާމް ހަމަޖައްސަންވާނެ ކަމަށެވެ.
Maldivian to commence repatriation flights from Colombo on 12th June & from Kuala Lumpur on 15th & 17th June. Before making travel arrangements passengers who wish to travel must arrange their own home quarantine/self-isolation prior to departure #Maldivian #NationalAirline
— Maldivian (@MaldivianAero) June 8, 2020
މީގެ އިތުރުން މާދަމާ ސްރީލަންކަން އެއާލައިންސްގެ ފްލައިޓެއްގައިވެސް 265 ދިވެއްސަކު ރާއްޖެ ގެނައުމަށް ސަރުކާރުން ވަނީ ނިންމައިފަ އެވެ. އެގޮތުން މާދަމާ ރާއްޖެ އަންނަ ދިވެހިންގެ ތެރޭގައި ބޭސްފަރުވާއަށާއި ފަތުރުވެރިންގެ ގޮތުގައި ލަންކާއަށް ގޮސް އަނބުރާ ރާއްޖެ ނާދެވިފައި ތިބި ފަރާތްތަކާއި، ކިޔަވާ ދަރިވަރުންގެ ތެރެއިން ކޯށް ނިމިފައި ތިބި ދަރިވަރުންގެ ތެރެއިން ރާއްޖެ ނާދެވިފައި ތިބި ފަރާތްތަކުގެ އިތުރުން ޞިއްޙީ ސަބަބުތަކަށްޓަކައި އަދި ދިރިއުޅުމުގެ ޙާލަތު ހުރި ގޮތުން އެނބުރި އަންނަން ބޭނުންވާ ފަރާތްތައް ހިމެނޭ ކަމަށް ފޮރިން މިނިސްޓްރީން ވަނީ ބުނެފައެވެ.
މީގެ ކުރިންވެސް ލަންކާ އާއި މެލޭޝިއާގައި ތާށިވެފައި ތިބި ބައެއް ދިވެހިން މޯލްޑިވިއަންގެ އެހީގައި ވަނީ ރާއްޖެ ގެނެސްފައެވެ.
