ނުރައްކާތެރި ކޮވިޑް19 ޖެހިފައިވާ މީހުންނަށް ފަރުވާދިނުމަށް މަސައްކަތް ކުރާ ހޮސްޕިޓަލްތަކަކަށް މަޝްހޫރު ދެ ފުޓްބޯޅަ ކުޅުންތެރިން ކަމަށްވާ ލިއޮނަލް މެސީ އާއި ކްރިސްޓިއާނޯ ރޮނާލްޑޯ އެހީތެރިކަން ފޯރުކޮށްދީފިއެވެ.
އެގޮތުން ރޮނާލްޑޯ އާއި މެސީ ވަނީ ކޮންމެ ކުޅުންތެރިޔަކު 1 މިލިއަން ޔޫރޯ ކޮވިޑް19 ޖެހިފައިވާ މީހުންނަށް ފަރުވާދިނުމަށް ކުރެވޭ މަސައްކަތަށް ހަދިޔާކޮށްފައެވެ.
ރޮނާލްޑޯގެ ފައިސާގެ އެހީ ފޯރުކޮށްދޭން ނިންމާފައި ވަނީ ޕޯޗުގަލްގެ ލިސްބަން އާއި ޕޯޓޯގައި ހުރި ހޮސްޕިޓަލްތަކަށެވެ. ރޮނާލްޑޯ ދޭ ފައިސާގެ އެހީ އިން ލިސްބަންގެ ސަންޓާ މާރިއާ ހޮސްޕިޓަލުގައި 20 މީހުންގެ ޖާގައިގެ 2 އައިސީޔޫ ޔުނިޓް ގާއިމްކުރުމަށް ވަނީ ހަމަޖެހިފައެވެ. އަދި ޕޯޓޯގެ ސަންތޯ އެންތޯނިއޯ ހޮސްޕިޓަލަށް ރޮނާލްޑޯ ދިން ފައިސާގެ އެހީ ބެނުންކޮށްގެން އައިސީޔޫއަށް 15 އެނދު އިތުރު ކުރެވޭނެ ކަމަށް އެ ހޮސްޕިޓަލުން ވަނީ ބުނެފައެވެ.
މެސީގެ ފަރާތުން އެހީ ފޯރުކޮށްދެނީ އާޖެންޓީނާގެ މެޑިކަލް ސެންޓަރަކަށާއި ސްޕެއިންގެ ބާސެލޯނާގައި ހުންނަ ކްލިނިކް ބާސެލޯނާ އަށެވެ. އެ އެހީގެ ފައިސާ ހޭދަކުރާނެ ގޮތުގެ ތަފްސީލެއް އަދި އެއްވެސް ފަރާތަކުން ހާމަކޮށްފައެއް ނުވެއެވެ.
މެސީގެ އިތުރުން ބާސެލޯނާގެ ކުރީގެ ކޯޗް ޕެޕް ގާޑިއޯލާ ވެސް ވަނީ ކޮވިޑް19 ޖެހިފައިވާ މީހުންނަށް ފަރުވާދޭ ބާސެލޯނާގެ މެޑިކަލް ކޮލެޖަކަށް އެހީވުމަށް 1 މިލިއަން ޔޫރޯ ހަދިޔާކުރަން ނިންމާފައެވެ. ގާޑިއޯލާ ދިން އެހީ އާއި އެކު އެ ކޮލެޖްގެ ހޮސްޕިޓލްގެ ޑޮކްޓަރުންނާއި ސިއްހީ އެހީތެރިން ނުރައްކާތެރި ކޮވިޑް19 ޖެހިފައިވާ މީހުންނަށް ފަރުވާދޭއިރު އެމީހުންގެ ރައްކާތެރިކަމަށް ބޭނުންކުރާނެ އާލާތްތަކާއި ސިއްހީ ސާމާނު ހޯދޭނެ ކަމަށް އެ ކޮލެޖުން ވަނީ ބުނެފައެެވެ.
