ވޮޝިންޓަން (27 މާރޗް): ވެނެޒުއޭލާގެ ރައީސް ނިކޮލަސް މަދޫރޯ އާއި ދެކޮޅަށް ހެކި ހޯދުމަށާއި އޭނާ ހައްޔަރުކުރުމުގައި އެހީވާ ފަރާތަކަށް 15 މިލިއަން ޑޮލަރުގެ އިނާމެއް އެމެރިކާގެ ސްޓޭޓް ޑިޕާޓްމަންޓުން ހުށަހަޅައިފިއެވެ.
މަދޫރޯ ހައްޔަރުކުރުމަށް ބޭނުންތެރި މައުލޫމާތެއް ފޯރުކޮށްދޭ ފަރާތްތަކަށް އެމެރިކާއިން ފައިސާގެ އިނާމު ހުށަހެޅިއިރު އެ ގައުމުން ވަނީ އޭނާގެ މައްޗަށް މަސްތުވާތަކެތީގެ ވިޔަފާރިކުރުމާއި ޓެރަރިޒަމްގެ ހަރަކާތްތައް ހިންގުމުގެ ތުހުމަތުކޮށްފައެވެ. އަދި 15 މިލިއަން ޑޮލަރު ދޭން ނިންމާފައި ވަނީ އެކަމާއި ގުޅޭ ހެކިި އެމެރިކާއަށް ހޯދައިދީ މަދޫރޯ ހައްޔަރުކުރަން އެހީވާ ފަރާތްތަކަށެވެ.
ވެނެޒެއޭލާގެ ރިޔާސީ އިންތިޚާބުގައި މަކަރު ހެދިކަމަށް ތުހުމަތުކޮށް އެގައުމުގެ ރައްޔިތުން ރައީސް މަދޫރޯގެ ސަރުކާރާއި ދެކޮޅަށް ނިކުމެ ކުރަން ފެށި މުޒާހަރާތައް ހޫނުވެ ވަކި ހިސާބަކުން އެމެރިކާ އާއި ބައެއް ހުޅަނގުގެ ގައުމުތަކުން ވަނީ ވެނެޒުއޭލާގެ އިދިކޮޅު ފަރާތްތަކަށް އެހީތެރިވާން ފަށާފައެވެ. އެހެން ނަމަވެސް އެ އެހީތެރިކަމާއި އެކު ވެސް ވެނެޒުއޭލާގެ ރައީސް ކަމުން މަދޫރޯ ދުރުކުރުމަށް އެމެރިކާ އާއި ހުޅަނގުގެ ގައުމުތައް ވަނީ ނުކުޅެދިފައެވެ. އޭގެ ސަބަބެއް ކަމުގައި ތަޖުރިބާކާރުން ވިދާޅުވަނީ ޗައިނާ އާއި ރަޝިޔާއިން ރައީސް މަދޫރޯ އަށް މަދަދުވެރިވަމުން ގެންދިއުމެވެ.
2019 ވަނަ އަހަރުގެ ތެރޭގައި އެމެރިކާގެ މަދަދަވެރިކަން ލިބެމުންދާ ވެނެޒުއޭލާގެ އިދިކޮޅު ލީޑަރު ހުއާން ގުއައިޑޯ ވަނީ ގައުމުގެ ވަގުތީ ރައީސަކީ އޭނާ ކަމަށް އިއުލާންކުރިއެވެ. އެއާއި އެކު އެމެރިކާ އާއި ދެކުނު އެމެރިކާގެ ގައުމުތައް ކަމަށްވާ ބްރެޒިލް، އާޖެންޓީނާ އަދި ކޮލަމްބިއާއިން އެކަން ބަލައިގަތެވެ. ކެނެޑާ، އިނިރޭސިވިލާތް އަދި ފްރާންސުން ވެސް މި ނިންމުން ބަލައިގަތުމުން ވެނެޒުއޭލާގެ ރައީސް ކަމުން މަދޫރޯ ދުރުކުރެވޭނެ ކަމަށް ބެލެވުނެވެ.
އެހެން ނަމަވެސް އެގައުމުގެ މުޒާހަރާތައް ވަރަށް ބޮޑަށް ހޫނުވެ ބަޣާވާތަކުން މަދޫރޯ ވެރިކަމުން ދުރުކޮށްލާނެ ކަމަށް ވަރަށް ބޮޑަށް ލަފާކުރެވިފައި ވަނިކޮށް ރަޝިޔާ އާއި ޗައިނާއިން މަދޫރޯގެ ދިފާއުގައި ނިކުތް ހިސާބުން މަންޒަރު ބަދަލުވެގެން ދިޔައެވެ. އެގޮތުން މަދޫރޯގެ ސަރުކާރާއި ދެކޮޅަށް އެތައް ހާސް ބަޔަކު މަގުތަކަށް ނުކުމެފައި ވަނިކޮށް ރަޝިއާގެ ހާއްސަ ޕްރައިވެޓް މިލިޓަރީ ޓީމެއް ވެނެޒުއެލާއަށް ފޮނުވާފައިވެއެވެ. މި ޓީމުން މަސައްކަތް ކުރީ މަދޫރޯ އާއި އޭނާގެ ސަރުކާރުގެ އިސްވެރިން ހިމާޔަތް ކުރުމަށެވެ.
އަހަރެއް ހާ ދުވަސް ވަންދެން އެމެރިކާއިން ވެނެޒުއޭލާގެ އިދިކޮޅު ލީޑަރަށް ފޯރުކޮށްދިން އެހީތެރިކަމާއި އެކު ވެސް މަދޫރޯގެ ސަރުކާރު ގުޑުވާލިފައި ނުވެއެވެ. ބައިނަލްއަޤްވާމީ ނޫސް ރިޕޯޓްތައް ބުނާ ގޮތުގައި ވެނެޒުއޭލާގެ ސަރުކާރާއި ދެކޮޅަށް ފެށި މުޒާހަރާތައް ދިގުލައިގެން ދިޔައިރުވެސް ނަތީޖާއެއް ފެނިފައި ނުވާތީ މިހާރު މުޒާހަރާތަކުގައި ބައިވެރިވަނީ ވެސް މަދު ބައެކެވެ.
އެމެރިކާއިން މަދޫރޯގެ މައްޗަށް މަސްތުވާތަކެތީގެ ވިޔަފާރި އާއި ޓެރަރިޒަމްގެ ދައުވާ ކުރަން ނިންމާފައިވާތީ އެކަމާޢި ގުޅިގެން ވެނެޒުއޭލަގެ ފޮރިން މިނިސްޓަރ ވިދާޅުވެފައި ވަނީ އެމެރިކާގެ އެ އަމަލުން ދޭހަވަނީ އެގައުމަށް ގޮތްހުސްވެފައިވާ މިންވަރު ކަމަށެވެ.
މަސްދަރު: ރަޝިޔަން ޓެލެވިޒަން ނެޓްވޯކް
