ކޮވިޑް-19 އާ ގުޅިގެން ޤައުމީ ކުތުބުޚާނާގެ ޙިދުމަތް ވަގުތީގޮތުން މެދުކަނޑާލައިފި އެވެ.
ޤައުމީ ކުުތުބުޚާނާއިން މިއަދު ކުރި އިއުލާނެއްގައި ބުނެފައި ވަނީ މިހާރު ފެތުރެމުންދާ ކޮވިޑް-19 ވައިރަސް އިން ރައްކާތެރިވުމަށް އަޅާ ފިޔަވަޅެއްގެ ގޮތުން މާރިޗު 12 ވާ ބުރާސްފަތި ދުވަހުން ފެށިގެން ޤައުމީ ކުތުބުޚާނާއިން ދެމުން ގެންދިޔަ ޙިދުމަތްތައް ވަގުތީގޮތުން މެދުކަނޑާލާފައިވާ ކަމަށެވެ.
އަދި އެ މުއްދަތުގައި ޤައުމީ ކުތުބުޚާނާ އާއި ކުޑަކުދިންގެ މަލްޓިމީޑިއާ ލައިބްރަރީއަށް އަނބުރާ ގެންނަންޖެހޭ (ރިޓާރން) ތަކެތި، ކުތުބުޚާނާގެ ޚިދުމަތް ދެން ދޭންފަށާ ދުވަހުން ފެށިގެން 07 ދުވަހުގެ ތެރޭގައި އިތުރު ޖޫރިމަނާއަކާ ނުލާ ބަލައިގަނެވޭނެ ކަމަށްވެސް އެ އިއުލާނުގައި ބުނެފައި ވެއެވެ.
އަދި އެކަމުގައި ލައިބްރަރީ ބޭނުންކުރާ ފަރާތްތަކަށް ދިމާވެދާނެ ދަތިތަކަށްޓަކައި ޤައުމީ ކުތުބުޚާނާއިން ވަނީ މަޢާފަށްވެސް އެދިފައެވެ.
ކުޑަކުދިންގެ މަލްޓިމީޑިއާ ލައިބްރަރީންވެސް މިއަދު ކުރި ޓްވީޓެއްގައި ބުނެފައި ވަނީ މިއަދުން ފެށިގެން އެ ލައިބްރަރީ ވަގުތީ ގޮތުން ބަންދު ކުރުމަށް ނިންމާފައިވާ ކަމަށާއި، ކަސްޓަމަރުންނަށް ދިމާވެދާނެ ދަތިތަކަށްޓަކައި މަޢާފަށް އެދޭ ކަމަށެވެ.
ކޯވިޑް-19 ވައިރަސް، އިން ކުޑަކުދިން ރައްކާތެރި ކުރުމަށް ނެގޭ ފިޔަވަޅެއްގެ ގޮތުން 12 މާރޗް 2020 ވާ ބުރާސްފަތި ދުވަހުން ފެށިގެން ކުޑަކުދިން ލައިބްރަރީ ވަގުތީގޮތުން ބަންދުކުރުމަށް ވަނީ ނިންމާފައެވެ. ކަސްޓަމަރުންނަށް ދިމާވެދާނެ ދަތިތަކަށްޓަކައި ނިހާޔަތަށް މަޢާފަށް އެދެމެވެ.
— Children's Multimedia Library (@CMLibrarymv) March 12, 2020
ޗައިނާގެ ވުހާން އިން އުފެދުނު ނުރައްކާތެރި ކޮވިޑް-19 މިހާރު ރާއްޖެއިންވެސް ފެނިފައިވާއިރު، މިހާތަނަށް އެ ބައްޔަށް ރާއްޖެއިން އަށް މީހަކު ވަނީ ޕޮޒިޓިވްވެފަ އެވެ. އެކަމާއި ގުޅިގެން މިޑް ޓާމް ބަންދަށްފަހު އަންނަ ހަފްތާގައި ސްކޫލްތައް ހުޅުވާގޮތަށް ހަމަޖެހިފައި ވަނިކޮށް، މިހާރު ސްކޫލް ހުޅުވުން ވަނީ އިތުރު އެއް ހަފްތާއަށް ލަސްވެސް ކޮށްފައެވެ.
