ކުރިއަށް އޮތް ލޯކަލް ކައުންސިލްތަކުގެ އިންތިޚާބުގެ 33%ވަނީ އަންހެނުންނަށް ޚާއްސަކޮށްފައެވެ. ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު ބާއްވަން ހަމަޖެހިފައި ވަނީ އަންނަ އޭޕްރީލް މަހުގެ 04 ވަނަ ދުވަހު އެވެ.
ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ދިވެހި ރައްޔިތުންގެ ޕާޓީ (ޑީއާރުޕީ) އިންވެސް ހުރިހާ ދާއިރާއަކަށް ވާދަކުރަން ނިންމައިފި އެވެ.
ޑީއާރުޕީން ބުނީ އެ ޕާޓީގެ ކައުންސިލުން ވަނީ ކައުންސިލްތަކުގެ އިންތިޚާބުގައި ހުރިހާ ދާއިރާއަކަށް ކުރިމަތިލުމަށާއި، މި ހިނގާ ފެބްރުއަރީ މަހުގެ ފަހުކޮޅު ގާފަރުގައި ބާއްވާ އެ ޕާޓީގެ އާންމު ޖަލްސާގައި ކެންޑިޑޭޓުންނާއި ޓިކެޓް ހަވާލުކުރުމަށް ނިންމާފައި ކަމަށެވެ.
މީގެ އިތުރުން ޑީއާރުޕީން ބުނީ އެ ޕާޓީގެ ޓިކެޓާއެކު ކެމްޕެއިނަށް ޚަރަދުކުރާ ފައިސާވެސް ހަވާލުކުރެވޭނެ ކަމަށެވެ.
ޑީއާރުޕީގެ ޓިކެޓުގައި ކައުންސިލްތަކުގެ އިންތިޚާބަށް ވާދަކުރުމަށް ޝަޢުޤުވެރިވާ ފަރާތްތަކަށް އެ ފުރުޞަތު ހުޅުވާލީ މިދިޔަ ޑިސެމްބަރު މަހުގެ 13 ވަނަ ދުވަހު އެވެ. އެ ޕާޓީގެ ޓިކެޓަށް އެދިލައްވާ ފަރާތްތަކުން އެކަމަށް އެދި ހުށަހަޅާނީ ޑެޕިއުޓީ ލީޑަރ، ޢަބްދުﷲ ރިފާޢު އަށެވެ.
#DRP ge ticket ah edhilavva faraaithakun Party ge Deputy Leader @RifauMP 7775884 sms, whatsapp 7992624 viber nuvatha email: [email protected] ah email kuravvaa @raajjemv @VaguthuOnline @sunbrk @Mihaarunews
— DRP (@drpmaldives) February 11, 2020
ޑީއާރުޕީންގެ މީގެ ކުރިން ބުނި ގޮތުގައި އެ ޕާޓީގެ ޓިކެޓް ދިނުމުގައި ބަލާނީ މަދުވެގެން 100 އާ މެންބަރުންގެ ފޯމް ހުށަހެޅުމާއެކު ޤާނޫނީ ޝަރުތު ފުރިހަމަވާ ފަރާތްތަކަށް ކަމަށެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކެންޑިޑޭޓުންގެ ގޮތުގައި ކުރިމަތިލުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލާފައި ވަނީ މިމަހުގެ ފަސްވަނަ ދުވަހު އެވެ.
އެކަމަށް ޝައުޤުވެރިވާ ފަރާތްތަކުން އެޕްލިކޭޝަން ފޯމާއި އެހެނިހެން ލިޔެކިޔުންތަކާއެކު އީސީ އަށް ހުށަހަޅަންޖެހޭނީ ފެބްރުއަރީ 20 ވާ ބުރާސްފަތި ދުވަހުގެ 15:00ގެ ނިޔަލަށެވެ.
