މިއަދަކީ ރާއްޖޭގެ އެންމެ ބޮޑު އެއް ސިޔާސީ ހަރަކާތް ހިނގާނެ ދުވަސް ކަމުގައި ރައްޔިތުންގެ މަޖިލިހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ލޯކަލް ކައުންސިލް އިންތިޚާބުގެ އެމްޑީޕީޕްރައިމަރީ އަށް އިޝާރާތް ކުރައްވަވައި ނަޝީދު މިއަދު ކުރެއްވެވި ޓުވީޓެއްގައި ވިދާޅުވެފައިވަނީ 909 ކެންޑިޑޭޓުން ބައިވެރިވެ 169 ވޯޓުފޮށި ބެހެއްޓި ، އެމްޑީޕީގެ އެތައް ހާސް މެމްބަރުން ނިކުމެ ވޯޓު ދެއްވާ ޑިމޮކްރަސީގެ ރިވެތި އުސޫލުތައް ދައްކުވައި ދެއްވުން އެދޭކަމަށެވެ.
Miadhakee Raajjeygai enme bodu eh siyaasee harakaiy higaane dhuvas. Local Council ge MDP primary inthikhab ge dhuvas. 909 candidatun baiverive, 169 vote foshi behetti, MDPge ethah haas memberun nukume vote dhevva democracy ge rivethi usooluthah dhakkuva dhevvane dhuvaheh
— Mohamed Nasheed (@MohamedNasheed) January 31, 2020
ފޯރިގަދަ ކެމްޕެއިނަކަށް ފަހު މިއަދުގެ މެންދުރުފަހު 2:00 އިން ފެށިގެން ރޭގަނޑު 7:00 އަށް ވޯޓުލުން ކުރިއަށް ގެންދެވޭނެ ކަމަށް އެމްޑީޕީން ވަނީ ބުނެފައެވެ. އެމްޑީޕީގެ އިންތިހާބާ ބެހޭ ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ހެންވޭރު ދާއިރާގެ މެމްބަރު އިބްރާހީމް މުއިއްޒު ވިދާޅުވީ ލޯކަލް ކައުންސިލް އިންތިހާބުގައި 179 ރަށު ކައުންސިލް، ހަތަރު ސިޓީ ކައުންސިލް އަދި 18 އަތޮޅު ކައުންސިލަކަށް ވާދަކުރަން އެމްޑޕީން ހުޅުވާލި ނަމަވެސް ޕްރައިމަރީ ބާއްވަން ޖެހިފައި ވަނީ 93 ރަށެއްގައި ކަމަށެވެ.
ލޯކަލް ކައުންސިލްތަކުގެ ގާނޫނަށް ބަދަލު ގެނެސް، މޭޔަރުންނާއި ކައުންސިލްތަކުގެ ރައީސުން ވަކިން ހޮވާ ގޮތަށް ހަމަޖެއްސުމާއި ކައުންސިލްތަކުގެ ދައުރު ފަސް އަހަރަށް ބަދަލުކުރުން ފަދަ ސަބަބުތަކާ ހެދި މި އަހަރުގެ އިންތިހާބުގެ ވާދަވެރިކަން ވަނީ ބޮޑުވެފަ އެވެ. އެގޮތުން މާލެ އާއި އައްޑޫ އަދި ފުވައްމުލަކުގެ މޭޔަރުންގެ ގޮނޑި އަށް އެމްޑީޕީގެ ވަރުގަދަ އެތައް ބޭފުޅުންނެއް ވާދަކުރައްވަ އެވެ.
