ނަކަލުކޮށްފައިވާ (ކައުންޓަރފިޓް) ޕާސްޕޯޓެއްގައި ރާއްޖެ އެތެރެވާން އުޅުނު މީހަކު މޯލްޑިވްސް އިމިގްރޭޝަނުން ހުއްޓުވައިފި އެވެ.
އިމިގްރޭޝަނުން މިއަދު ކުރި ޓްވީޓެއްގައި ބުނީ ނަކަލުކޮށްފައިވާ ޕާސްޕޯޓެއް ބޭނުންކޮށްގެން ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ރާއްޖެ އެތެރެވުމަށް މަސައްކަތްކޮށްފައި ވަނީ އުމުރުން 44 އަހަރުގެ ބިދޭސީއަކު ކަމަށެވެ.
Nakalu koffaivaa (counterfeit) passporteh beynun koggen Velana International Airport in Raajje etherevumah masakkaiykuri 44 aharuge bidheysee firihenaku Maldives Immigration in huttuvaifi.#RayyithugeKhidhumathuga#BorderSecurity pic.twitter.com/poTcZMJQ8U
— Maldives Immigration (@ImmigrationMV) November 20, 2019
އިމިގްރޭޝަނުން އޭނާ ހުއްޓުވާފައިވާއިރު، އެ ޓްވީޓާއެކު އޭނާގެ ފޮޓޯއެއްވެސް އިމިގްރޭޝަނުން ވަނީ އާންމުކޮށްފަ އެވެ.
ނަމަވެސް މި މައްސަލައާ ގުޅޭ އިތުރު އެއްވެސް ތަފްސީލެއް އިމިގްރޭޝަނުން ހާމަކޮށްފައެއް ނުވެއެވެ.
މިދިޔަ އޮކްޓޯބަރު މަހުގެ 13 ވަނަ ދުވަހުވެސް ވަގު ޕާސްޕޯޓެއްގައި ވީއައިއޭ އިން ރާއްޖެ އެތެރުވުމަށް މަސައްކަތް ކުރި ބިދޭސީ އަންހެނަކާއި، އެކަމުގައި އޭނާއަށް އެހީތެރިވާން އުޅުނު އިތުރު ބިދޭސީ ފިރިހެނަކުވެސް ވަނީ ހުއްޓުވައިފަ އެވެ.
މީގެ އިތުރުން، އެހެން މީހެއްގެ ޕާސްޕޯޓު ބޭނުންކޮށްގެން ރާއްޖެ އެތެރެވާން މަސައްކަތްކުރި ދެ މީހަކު ސެޕްޓެމްބަރު މަހު ވެސް އިމިގްރޭޝަނުން ވަނީ ހިފަހައްޓައިފަ އެވެ. އަދި ވަގު ވާރކް ވިސާތަކެއް އެތެރެކުރަން އުޅުނު މީހަކުވެސް މިދިޔަ މަހުގެ ތެރޭގައި އިމިގްރޭޝަނުން ވަނީ ހުއްޓުވައިފަ އެވެ.