އައްޑޫ ސިޓީ ހުޅުމީދޫ ނަރުދަމާ ނިޒާމުގެ ނަޖިސް ކަނޑަށް ބޭރު ކުރުމަށްޓަކައި އަޅާފައިވާ މައި ހޮޅި ހަލާކުވެ ފަރުމައްޗަށް ނަޖިސް ބޭރުވާ މައްސަލަ ފެންމަތިވެއްޖެއެވެ.
‘އޭއޯ ނިއުސް’އަށް މައުލޫމާތު ދެމުން މީދޫ މީހަކު ބުނީ ވެމްކޯ ސަރަހައްދުން ކަނޑަށް ގުޅާފައިވާ މައި ހޮޅި ހައްޔަރުކުރުމަށް ޖަހާފައިވާ ބޮލެޓްތައް ނެއްޓުމުގެ ސަބަބުން އެ ހޮޅި ހަލާކުވެފައިވާތާ މިހާރު ހަތަރު މަހަށްވުރެ ގިނަ ދުވަސްވެފައިވާ ކަމަށެވެ.”މިހާރު ނަރުދަމާގެ ކަންތައްތައް ބަލަހައްޓަމުންދަނީ ފެނަކަ އިން. އެމީހުންގެ ސަމާލުކަމަށްވެސް އެ މައްސަލަ އައިސް އެއްވެސް ކަހަލަ ހައްލެއް ނުލިބި އެންމެ ފަހުން މިހާރު އެ ހޮޅިން ނަޖިސްތައް ފަރު މައްޗަށް ބޭރުވާން ފަށައިފި.” އެ މީހާ ބުންޏެވެ. މި މައްސަލަ އާއި ގުޅިގެން ފެނަކަ ހުޅުމީދޫ ބްރާންޗްގެ ބަހެއް އަދިވަނީ ލިބޭ ގޮތް ނުވެފައެވެ.
ހުޅުމީދޫގެ ނަރުދަމާގެ ނިޒާމް ގާއިމްކުރުމުގެ މަޝްރޫޢު އިފްތިތާޙްކޮށްފައިވަނީ 2017 ވަނަ އަހަރު އޭރުގެ މިނިސްޓަރ އޮފް އެންވަޔަރަންމަންޓް އެންޑް އެނަޖީ ތޯރިގް އިބްރާހީމެވެ.ސްރީލަންކާގެ ސިއެރާ ކޮންސްޓްރަކްޝަން ކުންފުންޏާ ޙަވާލުކޮށްގެން ކުރިއަށް ގެންދިއަ މި މަޝްރޫއަކީ އޮފިޑްގެ ލޯން އެހީގެ ދަށުން 113 މިލިއަން ރުފިޔާ ޚަރަދުކޮށްގެން ހިންގާފައިވާ މަޝްރޫއެކެވެ..
