އަންނަ ހޮނިހިރު ދުވަހު ރާއްޖޭގައި ބޭއްވުމަށް ތައްޔާރުވަމުންދާ ލޯކަލް ކައުންސިލް އިންތިޚާބުގައި ވޯޓުލުމަށް އައްޑޫގެ އެކި ދާއިރާތަކުގައި މުޅިއެކު 31 ވޯޓު ފޮށި ބަހައްޓާނެ ކަމަށް އިލެކްޝަން ކޮމިޝަނުން ހާމަކޮށްފިއެވެ. އިލެކްޝަނުން އާންމުކޮށްފައިވާ އިއުލާނުގައި ވާ ގޮތުން ހިތަދޫގެ 3 ދާއިރާގެ ރައްޔިތުން ވޯޓުލުމަށް 15 ވޯޓު ފޮށްޓެއް ބަހައްޓާނެ އެވެ. މަރަދޫފޭދޫގައި 2 ވޯޓު ފޮށި ބެހެއްޓުމަށް ހަމަޖެހިފައިވާއިރު ހުޅުދޫގައި 3 ވޯޓު ފޮށި ބަހައްޓާނެއެވެ. މީދޫގައި ވެސް 3 ވޯޓު ފޮށި ބަހައްޓާއިރު ފޭދޫގައި 5 ވޯޓު ފޮށި އަދި މަރަދޫ ގައި 3 ވޯޓު ފޮށި ބަހައްޓާނެ ކަމަށް އިލެކްޝަނުގެ އިއުލާނުގައި ވެއެވެ. މައުލޫމާތު ލިބިފައިވާ ގޮތުގައި ކައުންސިލް އިންތިޚާބުގައި ވޯޓުލުމަށްޓަކައި މުޅި ރާއްޖޭގައި ޖުމްލަ 422 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ. ކައުންސިލް އިންތިޚާބު ބޭއްވުމަށް އެންމެ 2 ދުވަހަށް ވެފައިވާއިރު އިންތިޚާބުގައި ވާދަކުރައްވަވާ ކެންޑިޓޭޓުން ގެންދަވަނީ ފޯރިއާއެކު ކެމްޕެއިން ކުރައްވަމުންނެވެ.
