ޤާނޫނީ ވަކީލުންގެ ކަންކަން ރެގިއުލޭޓް ކުރުމަށް އުފެއްދި ބާ ކައުންސިލްގެ އަންނަ އަހަރުގެ ބަޖެޓް އެކުލަވާލުމަށް ވަކީލުންގެ ޚިޔާލު ހޯދުމަށް އެ ކައުންސިލުން ފުރުސަތު ހުޅުވާލައިފިއެވެ.
ބާ ކައުންސިލުން ކުރި ޓުވީޓެއްގައިވަނީ އެ ކައުންސިލްގެ އަންނަ އަހަރުގެ ބަޖެޓް އެކުލަވާލުމުގެ މަސައްކަތް އެ ކައުންސިލްގެ އެގްޒެކެޓިވް ކޮމެޓީން ކުރަމުންދާ ކަމަށެވެ. އެހެންވެ، އަންނަ އަހަރު ހިންގުން މުހިންމު ޕްރޮގްރާމެއް ނުވަތަ ޙަރަކާތެއް އޮތް ކަމަށް ދެކޭ ނަމަ އެކަން އެ ކައުންސިލާ ހިއްސާ ކުރަން އެދޭ ކަމަށް ބާ ކައުންސިލްގެ ޓުވީޓުގައި ވެއެވެ.
އެ ކައުންސިލްގެ އިއުލާނުގައި ބުނެފައިވަނީ ޚިޔާލު ހުށައެޅުމުގެ ފުރުސަތު މިމަހުގެ 25 ވަނަ ދުވަހާއި ހަމައަށް އޮންނާނޭ ކަމަށެވެ. ބާ ކައުންސިލުން ދަނީ އެ ކައުންސިލުންގެ ކަންކަމުގައި ވަކީލުންގެ އެހީތެރިކަމާއި ޚިޔާލު ހޯއްދަވަމުންނެވެ. އެގޮތުން އެ ކައުންސިލްގެ ދާއިމީ ސަބް ކޮމެޓީތައް އެކުލަވާލުމުގައި ވަކީލުންގެ އެހީ ހޯދަން އިއުލާންކޮށްފައި ވެއެވެ.
