ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ގެ ސަރުކާރުން ޖުޑިޝަރީ އިސްލާހުކުރުމަށް ކުރަށްވަމުން ގެންދަވާ މަސައްކަތްތަކުގެ ތެރެއިން އަލަށް އުފެއްދެވި ބާ ކައުންސިލުން، ކުރީގައި ވަކާލާތު ކުރުމުގެ ހުއްދަ ސުޕްރީމްކޯޓުން ދީފައިވާ ވަކީލުންނަށް ދަށު ކޯޓުތަކުގައި ވަކާލާތުކުރުމަށް އަލުން ބާ ކައުންސިލުން ހުއްދައެއް ހޯދަން ނުޖެހޭނެ ކަމަށް ބާ ކައުންސިލުން ބުނެފިއެވެ.
ބާ ކައުންސިލުން މިދިޔަ ބުރާސްފަތި ދުވަހު ނިންމާފައިވާނީ، ޤާނޫނީ ވަކީލު ކަމުގެ ހުއްދަ ލިބިފަިއވާ ފަރާތްތަކުގެ ތެރެއިން ފަނޑިޔާރު ކަމުގައި މިހާރު ތިއްބެވި ބޭފުޅުން ފިޔަވައި އެހެން ހުރިހާ ވަކީލުންނަށްވެސް، އިތުރު ހުއްދައެއް ހޯދުމަކާއި ނުލައި ދަށު ކޯޓުތަކަށާއި، ޓްރައިބިއުނަލްތަކުގައި ވަކާލާތު ކުރުމުގެ ހުއްދަ އޮންނާނެކަމަށެވެ.
އެ ކައުންސިލުން ބުނީ ސުޕްރީމްކޯޓާއި ހައިކޯޓުގައި ވަކާލާތުކުރުމަށް އެދޭ ވަކީލުން އެ ދެ ކޯޓުގައި ވަކާލާތް ކުރުމުގެ ހުއްދަ އަށް އަލަށް އެދޭނަމަ ބާ ކައުންސިލުން އެކުލަވާލާފައިވާ ޤަވާއިދުގެ ދަށުން ހުއްދަ ދެވޭނޭކަމަށެވެ.
ސުޕްރީމްކޯޓުގައި ވަކާލާތުކުރުމުގެ ހުއްދަ ދެވެނީ ވަކި މުއްދަތަކަށް ތަޖުރިބާ ހުރުމުން ނެވެ. ނުވަތަ ވަކި ވަރަކަށް ދަށު ކޯޓުތަކުގައި ވަކާލާތުކުރުމުންނެވެ.
