މާލޭގެ ބާޒާރުމަތީގައި ޒަރޫރީ ބޭނުންތައް ފުއްދުމަށް ސަލާން ޖަހާ މީހުންގެ ހާލަތު ދެނެގަތުމަށް ޖެންޑާ މިނިސްޓަރު އުފެއްދެވި ކޮމެޓީއިން، އެފަދަ 20 މީހެއްގެ ހާލަތު ދެނެގަނެ އެ މީހުންގެ މައްސަލަތަކަށް ހައްލެއް ހޯދައި ދިނުމަށް މަސަައްކަތް ކުރަމުން އަންނަ ކަމަށް ޖެންޑާ މިނިސްޓްރީން މިއަދު ބުނެފި އެވެ.
މަގުމަތީގައި ސަލާންޖަހާ މީހުންގެ ހާލަތު ދެނެގަތުމަށް ޖެންޑާ މިނިސްޓަރު ވަނީ މިއަހަރުގެ ފެބްރުއަރީ މަހުގެ ފުރަތަމަ ދުވަހު އެ ސަރަހައްދުތަކަށް ވަޑައިގެން ސަލާންޖަހާ މީހުންގެ ހާލަތު ބައްލަވާލައްވައިފައެވެ.އެމީހުންގެ ހާލަތު ބެއްލެވުމަށް މިނިސްޓަރު ވަޑައިގެންނެވުމުން އެމީހުންގެ ފަރާތުން މިނިސްޓަރަށް ހިއްސާކުރި މައިގަނޑު ތިން ކަންބޮޑުވުމަކީ ވަޒީފާ ނުލިބުމާއި، ނުކުޅެދުންތެރިކަމެއް ހުރުން ނުވަތަ ބޭސްފަރުވާ ކުރުމަށް މާލީގޮތުން ނުކުޅެދުމާއި ބޯހިޔާވަހިކަން ހޯދުމަށް ހުރި ދަތިތަކެވެ.
އެ މިނިސްޓްރީން ނެރުނު ބަޔާނެއްގައި ބުނީ ސަލާންޖަހާ މީހުންގެ ހާލަތު ބަލަން މިދިޔަ ފެބްރުއަރީ މަހު އުފެއްދި “އިންޓަވެންޝަން ކޮމިޓީ”ން މިހާތަނަށް 20 މީހެއްގެ ހާލަތު ދެނެގަނެ ކުރިއެރުންތައް ހޯދާފައިވާ ކަމަށެވެ. ސަލާންޖަހާ މީހުންނަށް އެހިތެރިވުމުގެ ގޮތުން ޖެންޑާއިންވަނީ ފާހަގަކުރެވުނު 20 މީހުންގެ ތެރެއިން އިޖުތިމާއީ ރައްކާތެރި ކަމުގެ އޮނިގަނޑުގެ ތެރެއިން ލިބޭ އެލަވަންސްތަކަށް ޝަރުތު ހަމަވާ، އެހެން ނަމަވެސް އެފަދަ އެލަވަންސެއް ހަމަނުޖެހި ތިބި މީހުންނަށް އެލަވަންސް ލިބޭނެ މަގު ތަނަވަސް ކޮށްދީފައެވެ. އަދި އެ މީހުންގެ ތެރެއިން ސިއްހީ ފަރުވާ އަށް އެހީތެރިކަން ބޭނުންވާ މީހުން ދައުލަތުގެ އެހީދޭ މުއައްސަސާތަކާ ގުޅުވައި ދިނުމުގެ މަސައްކަތް ޖެންޑާއިންވަނީ ކޮށްފައެވެ.
ހަތަރު މީހަކު ވަޒީފާ ހޯދައިދޭން އެދުމުން ވަޒީފާ ދޭ ފަރާތްތަކާ އެމީހުންނާ ޖެންޑާ މިނިސްޓްރީން ވަނީ ގުޅުވައި ދީފަ އިވާއިރު އޭގެ ތެރެއިން އެކަކަށް މިހާރު ވަނީ ޖެންޑާ މިނިސްޓްރީން ވަޒީފާ ހަމަޖައްސައިދީފަ އެވެ.
މީގެ އިތުރުން އާއިލީ މައްސަލަތަކުގެ ސަބަބުން މަގުމަތި ވެފައިވާ މީހުންގެ ކަންކަން ބަލައި އާއިލާތަކާ ގުޅުވައި ދިނުމަށް އެހީތެރިވެފައިވާއިރު އޭގެ ތެރެއިން ބައެއް މީހުން އާއިލާގެ ބެލުމުގެ ދަށަށް ރަށަށް ފޮނުވައި ދިނުމުގައި ޖެންޑާއިންވަނީއެހީތެރިކަން ފޯރުކޮށްދެއްވާފައެވެ. އަދި އިތުރަށް ބަލަން ޖެހޭ ދެ މައްސަލައެއް ކަމާ ބެހޭ ފަރާތްކާ ގުޅިގެން ޖެންޑާއިން އަންނަނީ ބަލަމުންނެވެ.
